Ben Andoni, analist politik, duke folur në “Lajmet e Fundit”, në RTK për ndikimin e që mund të ketë presidenti Trump në Ballkan dhe më gjerë, tha se SHBA po përballet me sfida të shumta që vështirë se mund t’i zgjidhë brenda një mandati e lëre më brenda 24 orëve. Ai theksoi se Trump do të jetë më i hapur për të vazhduar marrëveshjen e arritur në Shtëpinë e Bardhë.
“Çfarëdo që të thuhet dhe cilido të jetë lidershipi i Kosovës, besoj se shteti amerikan ka një lloj kontrolli moral mbi Kosovën. E para, sepse është një lloj përgjegjësie e brezave të politikanëve që kanë krijuar një shtet mu në qendër të Evropës dhe është krijesa e tyre, por nga ana tjetër është një lloj përballje shumë e madhe për një lloj ekuilibrimi të Serbisë dhe të fuqive të tjera. I vetmi element që mungon në këtë ekuacion është qeverisja e Kosovës. Nëse Kurti do të përdor gjuhën që përdori ndaj Blinkenit dhe me zëvendësuesin e tije, mendoj se Kurti ka nxjerrë mësime dhe do të jetë i kujdesshëm me Trumpin”, tha Andoni.
Ai më tej theksoi se Trump do të jetë më i hapur për të vazhduar marrëveshjen e arritur në Shtëpinë e Bardhë ndërmjet ish-kryeministrit Hoti dhe me presidentin serb, Vuçiq, të arritur më 2020, sesa të merret me dialogun dhe me planin franko-gjerman.
Sa i përket politikës së jashtme amerikane, Andoni ka vlerësuar se premtimet e Trump-it për këtë çështje marrin kohë dhe në këtë stad që është SHBA-ja, këtë çështje nuk mund të zgjidhen brenda një mandati.
“Me forcimin e Kinës, më pak i Rusisë prej luftës dhe rritja e vendeve të zhvilluara sjellin shumë probleme për shtetin amerikan”, ka thënë Andoni.
Ai nënvizoi se SHBA tani po përballet me sfidat që janë jashtë mundësive të saj, teksa përmendi situatën në Gaza, pastaj luftën Rusi-Ukrainë, por edhe çështje të tjera në Azinë e largët, që vështirë se mund t’i përmbyllë të gjitha këto çështje jo brenda 24 orëve por as brenda një mandati.
