Trupat e Koresë së Veriut, të dislokuara në rajonin Kursk të Rusisë, i kanë luftuar forcat e Kievit në fushën e betejës, tha të enjten presidenti ukrainas Volodymyr Zelensky, duke shtuar se përleshjet rezultuan me vdekje.
Zelensky tha se 11,000 ushtarë të Koresë së Veriut ndodhen në rajon, ku inkursioni ushtarak tre-mujor i Ukrainës në territorin rus ka ngecur. Zelensky në samitin e Komunitetit Politik Evropian në Budapest, Hungari, tha se disa nga këto trupa tashmë kanë marrë pjesë në armiqësitë kundër ushtrisë ukrainase. Po, tashmë ka humbje, ky është një fakt. Ai nuk ka specifikuar se cila palë ka pësuar humbje.
Njoftimi i përdorimit të tyre në luftime vjen ndërsa Shtetet e Bashkuara dhe aleatët e saj peshojnë se si t’i përgjigjen partneritetit ushtarak në rritje midis Moskës dhe Phenianit.
Ukraina dhe aleatët e saj në NATO po vlerësojnë gjithashtu se si rizgjedhja e Trump do të ndikojë në balancën e luftës dhe po përgatiten për mundësinë e një reduktimi dramatik të mbështetjes së SHBA-së dy vjet e gjysmë pas pushtimit të Moskës.
Të enjten, presidenti rus Vladimir Putin bëri komentet e tij të para publike për zgjedhjet në SHBA, duke thënë se ai është gati për dialog me presidentin e zgjedhur republikan.
Zgjedhja e Trump për një mandat të dytë vjen në një moment të pasigurt të luftës. Ukraina është nën presion të ashpër në vijat e frontit, ku shefi i ushtrisë së saj ka paralajmëruar se forcat e tij po përballen me “një nga ofensivat më të fuqishme ruse” që nga fillimi i luftës.
Moska po lëshon gjithashtu valë thuajse të vazhdueshme të sulmeve me dronë me rreze të gjatë në qytetet ukrainase për të mposhtur mbrojtjen ajrore të Ukrainës, sipas një zëdhënësi të forcave ajrore të Ukrainës.
Presidenti ukrainas tha nga Budapesti të enjten se liderët botërorë nuk po i dëgjojnë mjaftueshëm lutjet e tij për të lejuar Kievin të përdorë armë me rreze të gjatë, ndërsa përballet me një “valë të re përshkallëzimi” që përfshin “ushtrinë e një shteti tjetër në luftën kundër Ukrainës”.
Zyrtarët amerikanë kishin paralajmëruar se rreth 10,000 trupa të Koresë së Veriut ndodhen në rajonin e Kurskut dhe pritet të hyjnë në luftime kundër Ukrainës. Por Zelensky i frikësohet një roli më të madh trupave të Koresë së Veriut nëse aleatët e tij nuk arrijnë të ushtrojnë më shumë presion ndaj Putinit.
