Pas akuzave nga Komuna e Prishtinës ndaj Ministrisë së Kulturës për dëmtim hapësire përreth Teatrit Kombëtar gjatë punimeve që po bëhen aty, ka reaguar kjo ministri. Thonë se aty po bëhet investimi më të madh që është bërë ndonjëherë në Teatrin Kombëtar të Kosovës, restaurimin e plotë dhe zgjerimin e hapësirave të tij.
“Për hartimin e këtij projekti janë angazhuar profesorë nga gjashtë fakultete të Universitetit të Prishtinës ndërsa jemi pajisur me leje nga Instituti i Kosovës për Mbrojtje të Monumenteve”, sqarojnë ata.
Sipas MKRS-së, largimi i drurit në afërsi të teatrit ka qenë i paraparë në projekt për shkak se siç kanë shpjeguar rrënjët e tij kanë qenë të mbështetura në muret e strukturës së ndërtesës, duke dëmtuar kështu strukturën dhe duke pamundësuar realizimin e punëve të drenazhimit, përforcimin e themeleve dhe vazhdimin e zbatimit të projektit.
“Po kujdesemi që projekti të zbatohet tërësisht, dhe punët të zhvillohen në mënyrën më profesionale. Natyrisht që druri i prerë do të zëvendësohet. Hapësirat e gjelbërimit janë të parapara dhe do të zbatohen në detaje”, përfundon sqarimi i Ministrisë së Kulturës. /Kosovatimes/
