Brukseli njoftoi më 14 nëntor se do të shpenzojë 300 milionë euro për t’iu ndihmuar nëntë vendeve anëtare të Bashkimit Evropian me blerjen e sistemeve të mbrojtjes ajrore, automjeteve të blinduara dhe municioneve.
Besohet se disa prej armëve do t’i jepen drejtpërdrejt Ukrainës, përderisa furnizimi me të tjera armë do t’i lirojë rezervat e vjetra të vendeve që ato t’i dërgohen Kievit.
Nënkryetarja ekzekutive e Komisionit Evropian, Margrethe Vestager, ka thënë se “kjo është hera e parë që ne [po përdorim] buxhetin e BE-së për t’i mbështetur shtetet anëtare në blerjen e përbashkët të produkteve të mbrojtjes”, duke shtuar se “projktet e caktuara do të rrisin, po ashtu, mbështetjen tonë për Ukrainën, me pajisje shtesë për mbrojtje”. /REL/
Gjashtëdhjetë milionë euro do të shpenzohen për blerjen e automjeve të blinduara për bartjen e ushtarëve, Patria 6×6.
Autoblindat finlandeze mund të bartin deri në 12 persona, dhe mund të konfigurohen për “notim” nëpër ujëra të qeta.
Edhe 60 milionë euro të tjerë do të shpenzohen për blerjen e sistemeve kundërajrore Mistral.
Arma franceze, e cila tashmë përdoret në Ukrainë, është më e rëndë sesa ekuivalentët e saj amerikanë dhe rusë që lëshohen nga krahu, por vendosja në trekëmbësh i mundëson periudha të vazhdueshme gatishmërie.
Një sistem i tuillë mund të përdoret nga ekipet e artiljerëve që operojnë në periferitë e kryeqyteteve ukrainase, të cilat kanë për detyrë të rrëzojnë dronët rusë në ardhje.
Rreth 120 milionë euro do të shkojnë për predha artilerie 155-milimetërshe.
Kalibri është standard i NATO-s, i përdorur në qindra obusë perëndimorë që i janë dhënë Ukrainës.
Mes një mungese akute prodhimi, secila predhë 155 mm sot kushton rreth 8.400 dollarë.
Gjashtëdhjetë miluonë euro do të shpenzohen për sistemet e mbrojtjes raketore IRIS-T SLM.
Arma gjermane mund të godasë objektiva ajrore nga një largësi prej 40 kilometrash. Sistemi i mbrojtjes ajrore ka një radar të aftë për të gjurmuar qindra objektiva individuale njëkohësisht. Ai, po ashtu, mund të vërejë objektiva në mënyrë optike, duke e bërë të padukshëm ndaj paralajmëruesve për radarë.
Gjermania është zotuar se do t’ia mundësojë Ukrainës nëntë sisteme IRIS-T deri më 2026.
Një fotografi e sistemeve koreanoveriore të artilerisë me rreze të gjatë veprimi, që thuhet se u realizua gjatë transportimit të tyre nëpër Rusi.
Zotimi prej 300 milionë eurosh nga Brukseli erdhi në një kohë kritike për Kievin, mes dëshmive në rritje se trupat e Koresë së Veriut po luftojnë përkrah forcave ruse në Ukrainë.
Kjo fotografi, e publikuar për herë të parë më herët këtë muaj, tregon, po ashtu, se Pheniani po dërgon armatim për t’i ndihmuar Rusisë me pushtimin tokësor të Ukrainës.
