Ekzekutivi kosovar ka paraparë që të hyjë sërish në kredi për realizimin e disa projekteve të rëndësishme. Si rrjedhojë, borxhi i brendshëm publik i Kosovës gjatë vitit 2025 parashihet të shkojë në mbi 1 miliard euro, ndërsa ai ndërkombëtar në mbi 1.2 miliardë. Ish-ministra të Financave e të Tregtisë thonë se fondet e marra nga jashtë nuk po shfrytëzohen si duhet.
Përmes kredive të brendshme dhe atyre ndërkombëtare, ekzekutivi kosovar ka paraparë realizimin e disa projekteve gjatë vitit të ardhshëm.
Si rrjedhojë, borxhi publik i Kosovës gjatë 2025-s pritet të shkojë mbi dy miliardë euro.
Stoku i borxhit të brendshëm do ta kapë vlerën e mbi 1 miliard eurove, ndërsa ai ndërkombëtar nga mbi 967 milionë sa ishte sivjet, do të shkojë mbi 1.2 miliard.
Ish-ministri i Financave, Haki Shatri, thotë se teksa Kosovës po i tepron buxheti, është e panevojshme që të merren kredi ndërkombëtare.
Ndërsa ish-ministri i Tregtisë dhe Industrisë, Ismet Mulaj, ka deklaruar se borxhi duhet të merret për projekte strategjike.
Të dy ish-ministrat thonë se me gjithë huamarrjet e deritanishme, shumë projekte kanë mbetur pa u realizuar.
Nga Qeveria e Kosovës nuk kanë kthyer përgjigje, ndonëse më parë nga ekzekutivi i patën thënë RTK-së se mjetet e marra nga borxhi deri më tani janë shfrytëzuar në projekte të ndryshme.
Sipas Kornizës Afatmesme të Shpenzimeve 2025-2027, sektorët që kanë përfituar më së shumti nnga huamarrja ndërkombëtare janë ai i infrastrukturës rrugore, i ujërave të zeza, i shëndetësisë, arsimit dhe bujqësisë.
Kosova prin nga vendet e rajonin me borxhin më të ulët publik.
