Kooperativa Bujqësore “Krusha” dhe Fahrije Hoti i kanë quajtur të pabaza deklaratat e ministrit të Bujqësisë, Faton Peci se Hoti ishte paditur nga Ministria e Bujqësisë në vitin 2017 për kthimin e një shume prej 17,800 eurosh, duke i quajtur këto si deklarata tendencioze.
Gjithashtu, në reagimin e tyre thuhet se kanë vërejtur përpjekje për të politizuar situatën, duke e lidhur atë me ngjyrime partiake, çka kanë thënë se është e papranueshme dhe e pavërtetë.
Prandaj kjo kooperativë do të mbajë edhe konferencë për media të hënën e javës që vjen për siç kanë thënë “demantimin e këtyre pretendimeve të pavërteta”.
“Duke marrë parasysh se kohëve të fundit, përmes rrjeteve sociale dhe faqes zyrtare të Facebook-ut të Ministrit të Bujqësisë, z. Faton Peci, po qarkullojnë deklarata dhe informacione të pabaza dhe tendencioze, me pretendimin se znj. Fahrije Hoti është paditur nga Ministria e Bujqësisë në vitin 2017 për kthimin e një shume prej 17,800 eurosh, ne ndjejmë të nevojshme të reagojmë. Gjithashtu, kemi vërejtur një përpjekje për të politizuar këtë situatë, duke e lidhur atë me ngjyrime partiake, çka është e papranueshme dhe e pavërtetë. Për këtë arsye, ftojmë të gjitha mediat e Kosovës të marrin pjesë në një konferencë shtypi, ku do të paraqiten fakte dhe argumente që demantojnë këto pretendime të rreme të shpërndara nga z. Peci”, thuhet në thirrjen publike për media të Kooperativës Bujqësore “Krusha”.
