Është hapur sot në hapësirat e Bibliotekës Kombëtare të Kosovës, ekspozita: Dorëshkrimet e Ismail Kadaresë, bashkorganizim i Agjencisë Shtetërore të Arkivave të Kosovës, Drejtorisë së Përgjithshme të Arkivave të Shqipërisë si dhe Institutit të Trashëgimisë Shpirtërore e Kulturore të Shqiptarëve në Shkup.
Në hapje u tha ndër të tjera se kjo ekspozitë jep një perspektivë tjetër të Kadaresë.
“Arkivi i Shqipërisë, me këtë ekspozitë po e fillon zbatimin të një detyre të patejkalueshme që e kanë e do ta kenë në të ardhmen shumë nga institucionet publike kulturore, shkencore e akademike në hapësirën mbarëkombëtare, për të trajtuar, përmbledhur, studiuar, përkujtuar e vlerësuar fuqinë e vizionit dhe gjenialitetin krijues të tij”, tha Bislim Bislimi, drejtor ekzekutiv i Agjencisë Shtetërore të Arkivave të Kosovës.
Drejtori i përgjithshëm i Arkivave të Shqipërisë, Ardit Bido, këtë e konsideroi si një nga dhuratat më të mira në 75-vjetorin e drejtorisë së përgjithshme të arkivave.
“Kjo bujari në pamje të parë të Gresa Kadaresë dhe Helena Kadaresë ishte dhurata më e mirë në këtë 75 vjetor të drejtorisë së përgjithshme të arkivave. Më shumë se sa kaq është një amanet i pashprehur drejtpërdrejt nga Kadareja”, tha Bido.
Blerina Rogova-Gaxha, drejtoreshë e Bibliotekës Kombëtare të Kosovës tha se për të si njohëse e veprës së Kadaresë dhe për të gjithë kjo ekspozitë jep një perspektivë tjetër të Kadaresë. “Jep një përspektivë të një ane të shkrimit e cila sot pothuajse është në zhdukje”, shtoi ajo.
Kjo ekspozitë u zhvillua në kuadër të manifestimit kulturor e shkencor “Ditët e Alfabetit”.
