Darka që është shndërruar në tradicionale e që quhet “Darka e Lamës”, që shtrohet nga familjarë e institucione atëherë kur kremtohen kryesisht të korrat vjetore, u shtrua edhe në Deçan përkatësisht në Llukë të Epërme.
Darka e Lamës, e njohur si darka e bereqetit, është festë tradicionale e kremtimit të të korrave vjetore të familjes. Si e tillë në të kaluarën jo shumë të largët ajo është organizuar pothuajse në çdo familje shqiptare.
Në nderim të kësaj tradite dhe trashëgimie, banorët e Llukës së Epërme në Deçan e organizuan Darkën e Lamës si dikur, e ku ishin ftuar miq e dashamirë të tyre.
“Darka e Lamës është mbajtur sikurse e kemi organizu sonte në Odën e Dervish Shaqës, i kemi ba nga pesë sofra, katër sofra, shokë, nipa, miq janë ardhë. Edhe kemi hangër darkë, pas darke kemi luajt kapuqa, edhe kemi pi çaj edhe tana lojnat i kemi ba. Edhe kjo traditë po vazhdon”, tha nikoqiri Ali Dervishi.
“Jemi mundu që traditën që ka qenë përpara ta vazhdojmë edhe sonte, edhe po më duket që ja kemi qëllue duke i përfshi ushqiet tradicionale, lojërat që janë luajt atëherë po edhe muzikë se rapsodët Dervish Saqa e Demush Nezirikanë lind po në këtë truall, e kështu e kemi vazhdu edhe sonte”, tha Xhavit Mulaj, përfaqësues i fshatit.
“Ishin elemente burimore, gjegjësisht traditat tona të vjetra duke filluar nga ushqimet tradicionale, i ptaëm lojërat, këngëtarët e mrekullueshëm sepse ky fshat në vazhdimësi jep këngëtarë të shquar”, deklaroi Jeton Berisha nga Pozhari.
“Ishte shumë kënaqësi dhe ndjenjë e veçantë që ta rifillojmë një aktivitet tash e 35 vjet pa e përsëritur si ngjarje në një fshat siç jemi ne që i takon historisë për shkak edhe të kaluarës së vet të lavdishme por edhe të atdhetarëve dhe veprimtarëve të mëdhenj”, u shpreh Hajdar Sutaj nga Lluka e Epërme.
Llukjanët thanë se kremtimi i Darkës së Lamës në fshatin e tyre do të jetë tradicional.
