Trajneri i Paris Saint-Germain, Luis Enrique, ka bërë thirrje për lojtarët e tij që ta rrisin nivelin e lojës në përballjen e së martës kundër Bayern Munich në Ligën e Kampionëve.
Ai e ka pranuar se fillimi i dobët i sezonit ka lënë ekipin e tij pa hapësirë për gabime, ndërsa ndeshja kundër gjermanëve në “Allianz Arena” konsiderohet një sfidë jetike për fatin e tyre në këtë kompeticion.
PSG ndodhet aktualisht jashtë zonës së “play-off”, në vendin e njëzet e pestë, pas një fitore dhe dy humbjeve në katër ndeshje të luajtura deri tani. Ndërkohë, Bayern pozicionohet në vendin e shtatëmbëdhjetë, me dy fitore dhe dy humbje.
“Është shumë e qartë se jemi dy skuadra të ngjashme. Duam të kemi topin dhe të ushtrojmë presion të lartë”, ka thënë Enrique. “Me shumë gjasë, duhet të shkojmë më larg se sa Bayerni. Duhet të vrapojmë më shumë, të rrisim nivelin, sidomos kur Bayerni luan në shtëpi.”
Bayerni ka qenë një pengesë për PSG-në në ndeshjet e fundit në Champions League. Gjermanët kanë fituar tri ndeshjet e fundit kundër ekipit francez, ndërsa PSG nuk ka arritur të shënojë asnjë gol në këto përballje.
