Në qytetin KRYESOR të Gjeorgjisë, Tbilisi, për katër netë radhazi po zhvillohen përleshje të ashpra mes policisë dhe protestuesve pro-evropianë, të cilët janë të pakënaqur me vendimin për shtyrjen e debatit për anëtarësimin e vendit në Bashkimin Evropian.
Protestuesit hedhin kokteje molotovi dhe fishekzjarre ndaj oficerëve të policisë. Gjithashtu, ata kanë ngritur barrikada në rrugë dhe më pas i kanë vënë flakën. Policia përgjigjet me gaz lotsjellës dhe ujë.
BE kërcënon me sanksione
Protestat po zhvillohen edhe në qytete të tjera në të gjithë Gjeorgjinë. Përplasjet – dhe thellimi i krizës politike midis qeverisë konservatore nacionaliste dhe opozitës pro-evropiane – kërcënojnë të ndajnë vendin. Bashkimi Evropian mund të vendosë sanksione për shkak të ngjarjeve të fundit në Gjeorgji, tha dje përfaqësuesja e re e lartë e BE-së për politikën e jashtme, Kaja Kallas.
“Është e qartë se përdorimi i dhunës kundër protestuesve paqësorë nuk është i pranueshëm dhe qeveria (gjeorgjiane) duhet të respektojë vullnetin e popullit gjeorgjian, por edhe kushtetutën gjeorgjiane,” tha Kallas gjatë një vizite në Kiev.
