Në Seminarin e organizuar nga Komisioni i Monitorimit të Asamblesë Parlamentare të Këshillit të Evropës në Kuvendin e Shqipërisë me përfaqësues të sistemit të drejtësisë, drejtuesi i SPAK-ut, Altin Dumani, deklaroi se ky institucion i ri ka regjistruar një seri çështjesh penale me nismën e vet dhe ka kryer sekuestrime dhe konfiskime të konsiderueshme.
“SPAK-u ka ndjekur çështje penale nën dyshimet për korrupsion ndaj zyrtarëve të ndryshëm në pushtetin legjislativ, ekzekutiv, pushtetin vendor dhe atë gjyqësor, gjyqtarë, prokurorë, avokatë, si dhe funksionarë të lartë të policisë së shtetit. Ndaj krimit të organizuar janë ndjekur çështje penale ndaj grupeve kriminale të përfshira në trafikun e lëndëve narkotike dhe në krime të dhunshme. Për të dyja grupet e hetimeve penale janë kryeer sekuestrime dhe konfiskime asetesh deri 150 milionë euro”, deklaroi zoti Dumani.
Ai tha se masa e sigurisë arrest me burg zë vetëm 49 për qind të totalit të masave të kërkuara, ndërsa numri total i të paraburgosurve për llogari të Prokurorisë së Posaçme është më pak se 9 për qind e numrit total të paraburgosurve në Shqipëri.
Drejtuesi i SPAK-ut theksoi se hetimet kanë zbuluar lidhje të shumta të zyrtarëve me grupet kriminale.
“Pothuajse në gjithë hetimet tona, ku në fokus ka qenë krimi i organizuar, kemi gjetur lidhje të këtij të fundit edhe me zyrtarë të niveleve të ndryshme, të cilët janë korruptuar apo janë bërë pjesë e grupeve të krimit të organizuar”, tha ai.
Zoti Dumani theksoi se një shtyllë e suksesit të Prokurorisë së Posaçme është bashkëpunimi ndërkombëtar si në luftën kundër korrupsionit ashtu edhe kundër krimit të organizuar.
“Nga viti 2020 deri 2023 Prokuroria e Posaçme ka krijuar 32 skuadra të përbashkëta, nga të cilat 25 janë aktive. Këto skuadra janë angazhuar në hetimin e veprave të rënda penale si trafikimi i narkotikëve, pastrimi i parave, falsifikimi i dokumenteve, kalim të paligjshëm të kufirit në kuadër të grupit të strukturuar kriminal apo edhe të organizatës kriminale”, tha drejtuesi i SPAK-ut.
Ai i cilësoi si të shkëlqyeshëm bashkëpunimin me shumicën e prokurorive të vendeve anëtare të BE-së, joanëtare të BE-së, si dhe me prokuroritë homologe të vendeve të rajonit me Malin e Zi, me Kosovën dhe me Maqedoninë e Veriut.
Zoti Dumani theksoi se sfidë kryesore mbetet ruajtja e pavarësisë institucionale të SPAK-ut, e cila sigurohet nga ligjet dhe Kushtetuta, dhe që deri tani ka dhënë rezultate premtuese në çështje konkrete. Ai kërkoi të ngrihet në Kodin Penal pragu prej 500 euro si akt korruptiv, që i takon SPAK-ut, gjë që do ta fokusojë më shumë Prokurorinë e Posaçme në hetimin e çështjeve më të vështira, si dhe mundësinë e rikandidimit të prokurorëve të posaçëm pas mbarimit të mandatit 9 vjeçar.
SPAK-u ka tani 20 prokurorë, 60 hetues të Byrosë Kombëtare të Hetimit, 12 hetues financiarë, laborator modern të ekspertizës kriminalistike dhe përgjimit dhe ka investuar në pajisje të sofistikuara që mbështesin hetime të suksesshme.
