Të gjitha subjektet politike që duan të aplikojnë për certifikim që të zyrtarizojnë garën për zgjedhjet e 9 shkurtit, këtë mund ta bëjnë tashmë edhe online pasi KQZ-ja ka funksionalizuar platformën elektronike për aplikim, https://certifikimi.kqz-ks.org/.
Kjo sipas KQZ-së është bërë në kuadër të digjitalizimit të operacioneve të ndryshme zgjedhore, dhe si platformë do t’iu shërbejë subjekteve politike për të paraqitur aplikimin e tyre për certifikim dhe të listës së kandidatëve për deputetë për Zgjedhjet për Kuvendin e Kosovës, të cilat do të mbahen më 9 shkurt të vitit 2025.
KQZ-ja tashmë u ka krijuar dhe dërguar të gjitha partive politike të regjistruara aktualisht në Republikën e Kosovës dhe koalicioneve të deklaruara, ‘Userët’, përmes të cilëve mund të qasen në platformë dhe të ngarkojnë aplikimin për certifikim dhe listën e kandidatëve për deputetë.
Sipas njoftimit nga institucioni që organizon zgjedhjet, ‘Userët’ do t’i krijojnë edhe për të gjitha subjektet politike (iniciativat dhe kandidatët e pavarur) që kërkojnë të aplikojnë për certifikim për pjesëmarrje në zgjedhje.
“Për përdorim më të lehtë të kësaj platforme, Zyra për Regjistrim, Certifikim dhe Kontrollin Financiar të Subjekteve Politike ka mbajtur disa seanca trajnimi me përfaqësues të subjekteve politike”, thotë KQZ-ja.
Ndërsa me qëllim që atyre t’iu ndihmohet në përdorimin e platformës, në rast nevoje janë në dispozicion dy tavolina ndihmëse dhe një numër kontakti 038 200 81 010, i qasshëm nga ora 08:00 deri në orën 16:00.
Periudha e aplikimit për certifikim të subjekteve politike për pjesëmarrje në Zgjedhjet për Kuvendin e Kosovës dhe për dorëzimin e listës së kandidatëve për deputetë, ka filluar më 1 shtator dhe do të përfundojë më 11dhjetor 2024, në orën 16:00.
