Ambasada e Italisë në Kosovë, ka reaguar pas sulmit të EULEX-it dhe Policisë së Kosovës, gjatë mbrëmjes të së shtunës në veri të Kosovës.
Përmes një postimi në rrjetin social Twitter, kjo ambasadë ka shkruar se sulme të tilla me shok-bomba në drejtim të personelit të sigurisë të bashkësisë ndërkombëtare në Kosovë dhe ndaj Policisë së Kosovës, janë të pajustifikueshme.
Ambasada e Italisë në Kosovë, ka deklaruar se i dënon ashpër këto akte që ndodhën të shtunën në veri të Mitrovicës.
“Sulmet ndaj policisë së Kosovës dhe personelit të sigurisë së bashkësisë ndërkombëtare si EULEX-i, nuk kanë fare justifikim. Ne i dënojmë këto akte në termat më të ashpër”, thuhet në reagim.
Attacks on Kosovo Police and International community security personnel like @EULEXKosovo have no justifications at all. We condemn these acts in the strongest terms https://t.co/p2HomCY402
— Italy in Kosovo (@ItalyinKosovo) December 11, 2022
Sulmin ndaj EULEX-it me shok-bombë ne veri e ka dënuar edhe ambasadori gjerman, Jorn Rohde, i cili ka bërë thirrje që të dhuna ndaj organeve të rendit të ndalet tani.
“EULEX- i kontribuon në ofrimin e sigurisë për të gjithë qytetarët. Dhuna kundër EULEX-it dhe ofruesve të tjerë të sigurisë duhet të ndalet tani”, ka shkruar Rohde.
Edhe ambasadorja e Sllovenisë në Kosovë, Minca Benedejçiq, i ka quajtur të papranueshme sulmet e tilla.
“Sulmet ndaj Policisë së Kosovës dhe personelit të sigurisë ndërkombëtare janë të papranueshme”, ka shkruar ajo.
Attacks on Kosovo Police and international security personnel are unacceptable! @MZZRS @EULEXKosovo https://t.co/0Yg8sYvYsp
— Minca Benedejčič (@MBenedejcic) December 11, 2022
Sulmet e tilla i ka dënuar edhe ambasadori amerikan në Kosovë, Jeff Hovenier. Ai në Twitter shkroi se sulmet e tilla si ndaj Policisë së Kosovës si ndaj personelit të sigurisë ndërkombëtare janë të papranueshme.
Duke shtuar që përgjegjësit duhet të mbajnë përgjegjësi përmes sistemit të drejtësisë kosovare.
“ShBA i bashkohet, EULEX-it në dënimin e fuqishëm të sulmit ndaj një patrulle të EULEX-it, mbrëmë. Sulmet e dhunshme ndaj Policisë së Kosovës dhe personelit të sigurisë ndërkombëtare janë të papranueshme dhe përgjegjësit duhet të mbajnë përgjegjësi përmes sistemit të drejtësisë kosovare”, ka shkruar në Twitter Hovenier.
Misioni i EULEX-it ka bërë të ditur se mbrëmë një patrullë e vëzhguesve të EULEX-it është sulmuar me një shok-bombë në afërsi të Rudarit në veri të Kosovës.
Sipas njoftimit thuhet se nga ky sulm fatmirësisht nuk ka pasur të lënduar.
“Konfirmojmë se një bombë çorientuese (shok-bombë) është hedhur ndaj një patrulle vëzhguese të EULEX-it mbrëmjen e kaluar (10.12) në afërsi të Rudares. Asnjë zyrtar i Njësisë Policore të Specializuar të EULEX-it nuk është lënduar dhe nuk janë shkaktuar dëme materiale”, thuhet në njoftim.
