Bora e shënoi fitoren e dytë në këtë edicion të ProCredit Superligës. Prishtinasit në xhiron e 11-të fituan dramën ndaj Bashkimit me rezultat 87:86 (26:18, 23:24, 10:23, 28:21).
Vendasit ishin më të vendosur dhe këtë e treguan që në fillim, duke qenë në epërsi konstante në çerekun e parë, që e fituan 26:18. Lojë më e barabartë u zhvillua në periudhën e dytë, 23:24, për të shkuar në pushim me shifrat 49:42.
Prizrenasit nuk u dorëzuan dhe në periodën e tretë u rikthyen fuqishëm, duke përmbysur rezultatin, që pas 30 minutash ishte 59:65. Lojë interesante u zhvillua në dhjetë minutat e fundit. Tre minuta nga fundi, Bashkimi kishte epërsi deri në shtatë pikë, por Bora nuk u dorëzua dhe luftoi deri në fund, duke rikthyer epërsinë në të mirë të saj 87:84, kurse mysafirët ngushtuan në 87:86 dhe kishin aksionin e fundit të ndeshjes, por nuk ishin të saktë dhe Bora triumfoi 87:86, që ishte e dyta në këtë edicion.
Te vendasit u dalluan Alex Aveion Lomax me 23 pikë e shtatë asistime dhe Adem Mekic me 19 pikë e gjashtë asistime, ndërsa te mysafirët u dalluan Jayveous Mckinnis me 16 pikë e 12 kërcime dhe Mack Smith me 24 pikë.
Bora ka dy fitore e tetë humbje, ndërsa Bashkimi tetë fitore e tri humbje. /Kosovatimes/
