Komuniteti ndërkombëtar po ndjek me vëmendje zhvillimin e situatës në Siri, ku disa vende me interesa kyçe shprehin dëshirën e tyre për të marrë pjesë në formimin e qeverisë së ardhshme. Aleatët e presidentit të rrëzuar Bashar al-Assad, si dhe vendet që mbështesin rebelët, paraqesin pikëpamjet e tyre për hapat e ardhshëm.
Rusia
Moska, e cila thuhet se i dha azil Asadit dhe familjes së tij, raportoi se bazat e saj ushtarake në Siri ishin në “gadishmëri të lartë”. Megjithatë, një burim i paidentifikuar i Kremlinit tha për mediat ruse se rebelët garantojnë sigurinë e këtyre bazave. Rusia po bën thirrje për një takim urgjent të Këshillit të Sigurimit të OKB-së për të përcaktuar hapat e mëtejshëm.
Irani
Irani, një aleat i vjetër i regjimit të Asadit, ka thënë se pret të vazhdojë marrëdhëniet “miqësore” me Sirinë. Ministria e Jashtme e Iranit bëri thirrje për një “dialog kombëtar që përfshin të gjitha segmentet e shoqërisë siriane” me qëllim të krijimit të një qeverie gjithëpërfshirëse që do të përfaqësojë të gjithë qytetarët sirianë.
Turqia
Turqia, e cila mbështet disa grupe rebele, planifikon të intensifikojë përpjekjet për të vendosur paqen dhe stabilitetin në Siri. Ministri i Jashtëm Hakan Fidan tha se Turqia do të fokusohet në gjetjen e një zgjidhjeje për kthimin e miliona refugjatëve sirianë, shumë prej të cilëve aktualisht ndodhen në Turqi.
SHBA
Presidenti amerikan Joe Biden e quajti situatën aktuale në Siri një “mundësi historike” për ndryshim, por shprehu shqetësimin për një vakum të mundshëm pushteti. Uashingtoni tashmë po ndërmerr veprime kundër zonave në Sirinë lindore, ku Shteti Islamik po përpiqet të rindërtojë praninë e tij.
Aktorët ndërkombëtarë vazhdojnë të promovojnë interesat e tyre ndërsa Siria hyn në një fazë të re dhe të pasigurt të historisë së saj, shkruan BBC.
