Siç shkruan Reuters, duke cituar burime në administratën e ardhshme të Trump, Kellogg do të vizitojë disa qytete të mëdha në Evropë, si dhe është planifikuar një udhëtim në Kiev.
Udhëtimi është planifikuar për në fund të janarit, pra pas datës 20 janar, kur Trump do të marrë zyrtarisht postin e presidentit amerikan nga Joe Biden.
Pritet që Kellogg të sjellë me vete planin e Trump për t’i dhënë fund konfliktit në Ukrainë dhe ta diskutojë atë me liderët evropianë dhe me presidentin e Ukrainës, Volodymyr Zelensky.
Ende nuk dihet shumë për planin, përveç se në ekipin e Trump ka dy rryma lidhur me përfundimin e luftës në Ukrainë.
Një version i planit, i cili do të përfshinte lëshime territoriale ndaj Rusisë dhe një bllok 20-vjeçar për hyrjen e Ukrainës në NATO, vjen nga bashkëpunëtorë të afërt me nënpresidentin e ardhshëm të SHBA, JD Vance.
Nga ana tjetër, ekziston edhe një ide për të rritur armatimin e Ukrainës dhe mbështetjen për këtë vend, gjë që do të mundësonte çlirimin e mundshëm të territorit nga pushtimi rus.
Kujtojmë se Donald Trump njoftoi disa herë gjatë fushatës së tij elektorale se do të “ndalonte luftën për 24 orë” me ardhjen në detyrë.
Shumë e interpretuan këtë si një shenjë se Kievi do të “detyronte” lëshime duke bllokuar ndihmën, por emërimi i Marco Rubio, një kritik i hapur i Rusisë, si sekretar i shtetit ka rritur optimizmin në Ukrainë se plani i Trump mund të duket ndryshe.
