Shpëtuesit malorë sllovenë gjetën sot trupin e një alpinisti hungarez i cili humbi në një stuhi dëbore në Alpe javën e kaluar. Në postimin në Facebook thuhet se ekipi gjeti një burrë në një luginë. Ata shtojnë se ai nuk ka dhënë shenja jete dhe se kufoma është duke u transportuar.
Ekipet e shpëtimit zbritën në humnerë duke përdorur litarë pasi mbërritën jo shumë larg vendit të aksidentit me një helikopter të policisë sllovene.
“Ne e gjetëm trupin e alpinistit 250 metra poshtë vendit të aksidentit. Ishte nën më shumë se dy metra borë,” tha shërbimi i shpëtimit. Dy alpinistë nga Hungaria humbën të dielën për shkak të motit të keq teksa ndodheshin në lartësinë rreth 1700 metra në Alpe, në veri të Lubjanës.
Ekipet e shpëtimit sllovenë nuk kanë mundur të fluturojnë me helikopter në atë zonë për ditë të tëra për shkak të erërave të forta. Një alpinist hungarez u gjet dhe u transportua në vend të sigurt të hënën, por shpëtimtarët u detyruan të tërhiqeshin pa gjetur njeriun, këmba e të cilit ishte thyer.
Sllovenia është e famshme për shëtitjet në Alpe. Autoritetet po u bëjnë thirrje vazhdimisht vizitorëve nga jashtë që të përgatiten dhe të kontrollojnë kushtet e motit përpara se të shkojnë në male.
