Ministri i Bujqësisë, Pylltarisë dhe Zhvillimit Rural, Faton Peci, në konferencën përmbyllëse për medie, ka prezantuar të arriturat dhe sfidat me të cilat është përballur sektori i bujqësisë gjatë vitit 2024.
Ministri Peci theksoi se është punuar intensivisht për të sjellë ndryshime pozitive në këtë sektor. Ai vuri në dukje një sërë arritjesh, përfshirë progresin në fushën legjislative dhe mbështetjen financiare për bujqit.
Sipas tij, gjatë këtij viti janë ekzekutuar miliona euro në formë grantesh dhe subvencionesh për bujqit kosovarë.
“Me të marrë detyrën si Ministër, buxheti i trashëguar për bujqësinë ishte 54 milionë euro. Nga to, mbi 40 milionë euro borxhe e ndërsa pjesa tjetër, të shpërndara para fushatës zgjedhore e de facto, isha një Ministër me 0 buxhet në kuletën institucionale. Po e lë këtë Ministri me 110 milionë euro në dispozicion të politikave të Ministrit të ardhshëm nga ku 90 milionë euro me ligj të buxhetit nacional e 20 milionë të tjera përmes partneriteteve e projekteve ndërkombtare. 300 milionë euro është vlera të cilën e kanë përfituar rreth 120,000 fermerë përmes granteve e subvencioneve duke i kontribuar kështu ngritjes së kapaciteteve prodhuese e përpunuese në sektorin e bujqësisë”, tha ai.
