Forcat izraelite arrestuan më shumë se 240 palestinezë, duke përfshirë dhjetëra staf mjekësor, si dhe drejtorin e një spitali në Rripin verior të Gazës që ata bastisën dje, sipas ministrisë së shëndetësisë të enklavës dhe ushtrisë izraelite.
Ministria e Shëndetësisë e Gazës tha se ishte e shqetësuar për Hussam Abu Safia, drejtori i spitalit Kamal Advan, sepse disa nga stafi i liruar nga ushtria izraelite vonë të premten dëshmuan se ishin rrahur nga ushtarët.
Ushtria izraelite thotë se spitali është përdorur si qendër komanduese për operacionet ushtarake të Hamasit dhe se të arrestuarit janë militantë të dyshuar. Abu Safija u mor për t’u marrë në pyetje sepse dyshohet se ishte operativ i Hamasit, shtuan burimet ushtarake.
Dje, Hamasi hodhi poshtë si gënjeshtër pretendimin izraelit se gjatë luftës 15 mujore në Gaza, luftëtarët e tij operuan nga një spital. Grupi ende nuk ka komentuar mbi 240 arrestimet.
OBSH: Ky ishte spitali i fundit i madh në Gazën veriore
Një bastisje në një spital, një nga tre objektet mjekësore në skajin verior të Rripit të Gazës, e vuri jashtë funksionit objektin e fundit të madh shëndetësor në veri të Gazës, tha Organizata Botërore e Shëndetësisë (OBSH) të enjten.
“OBSH është e tmerruar nga bastisja e djeshme. Prishja sistematike e sistemit shëndetësor dhe rrethimi i Rripit verior të Gazës, i cili ka zgjatur për më shumë se 80 ditë, vë në rrezik jetën e 75,000 palestinezëve që mbeten në zonë.” tha OBSH.
Pacientët u evakuuan në një spital që nuk është në funksion
Disa pacientë u evakuuan nga spitali Kamal Advan në spitalin indonezian në Jabaliya, i cili nuk është funksional. Stafi mjekësor u pengua të bashkohej me ta atje, tha Ministria e Shëndetësisë në Gaza. Pacientët dhe stafi i tjerë u dërguan në objekte të tjera mjekësore.
Ushtria izraelite tha se 350 pacientë dhe pjesëtarë të personelit mjekësor u evakuuan para këtij operacioni, ndërsa gjatë operacionit, në koordinim me autoritetet lokale shëndetësore, 95 të tjerë u evakuuan në një spital indonezian, ndërtimi dhe stafi i të cilit ishte siguruar nga Republika e Indonezia.
Ministria e Shëndetësisë në Gaza tha se 18 palestinezë u vranë në sulmet izraelite në enklavë të shtunën, të paktën nëntë prej tyre në një shtëpi në kampin Maghazi në Rripin qendror të Gazës.
Ushtria izraelite nuk komentoi mbi sulmet apo viktimat.
