Në çështjen gjyqësore ndaj ish-krerëve të Ushtrisë Çlirimtare të Kosovës (UÇK), Hashim Thaçi, Kadri Veseli, Rexhep Selimi dhe Jakup Krasniqi, Dhomat e Specializuara të Kosovës kanë vendosur të pranojnë me shkrim dëshmitë e dy dëshmitarëve.
Ky vendim është marrë më 6 janar, ndërsa mbrojtja do të ketë mundësinë t’i marrë në pyetje dëshmitarët përkatës. Angela Griep, zëdhënëse e Dhomave të Specializuara, theksoi gjatë konferencës së saj javore se ky vendim është pjesë e një procesi të vazhdueshëm të shqyrtimit të provave.
“Dëshmitë e shkrimtuara do të pranohen dhe mbrojtja do të mund t’i pyet dëshmitarët. Ky është një hap i rëndësishëm në përgatitjen e gjykimit,” tha Griep, duke shtuar se po ashtu është miratuar që një dëshmitar të japë dëshmi nëpërmjet video-konferencës.
Në të njëjtën çështje, më 20 dhjetor dhe 6 janar, trupi gjykues gjithashtu ka aprovuar disa kërkesa të Prokurorisë për paraqitjen e provave të tjera materiale dhe dëshmive të tjera shoqëruese. Ndërsa, më 18 dhjetor 2024, mbrojtësit e viktimave kishin kërkuar që një anëtar i familjes së një viktimë që ka ndërruar jetë, të mund të marrë pjesë në emër të saj gjatë procesit gjyqësor.
Në lidhje me çështjen tjetër që përfshin Hashim Thaçin dhe të tjerë, Griep e informoi publikun se më 20 dhjetor, gjykatësja e procedurës paraprake miratoi një kalendar për procesin e nxjerrjes së provave dhe përgatitjen e çështjes për gjykim. “Prokuroria tani ka obligim t’u dorëzojë mbrojtjes provat që do të përdorë gjatë gjykimit,” tha ajo.
Po ashtu, ajo përmendi vendimin e Kushtetueses për kërkesën e Thaçit, ku ky i fundit pretendon se janë shkelur të drejtat e tij themelore për shkak të masave hetimore të posaçme të urdhëruara ndaj tij gjatë periudhës së paraburgimit në vitin 2023.
Gjithashtu, më 23 dhjetor 2024, u bë i njohur një urdhër për kompensim ndaj Pjetër Shalës, i cili është obliguar të paguajë një shumë prej 208 mijë eurosh. Griep shtoi se trupi gjykues ka kërkuar që të caktohet një gjykatës i vetëm për mbikëqyrjen e zbatimit të këtij urdhri.
Në fund të konferencës, Griep përmendi se për të vazhduar procesin e kompensimit për viktimat e krimeve, është kërkuar nga Kosova miratimi i ligjeve të nevojshme dhe krijimi i një mekanizmi përkatës për dëmshpërblim.
