Kandidati i Partisë Demokratike të Kosovës për kryeministër, Bedri Hamza, në Viti është zotuar se me të si kryeministër do të ketë reforma ekonomike, përmirësim të mirëqenies së qytetarëve në fillim të mandatit, rritje prej 50 për qind më shumë mbështetje financiare për kategoritë e dala nga lufta, mbështetje për çiftet e reja, rritje të pensioneve, reforma në arsim e shëndetësi.
“Me mua, për mua, vota për PDK-në nënkupton më shumë vende të reja të punës, më shumë të ardhura. Do ta dyfishojmë buxhetin për barnat esenciale, familjarët e të sëmurëve me kancer nuk do ta kenë më hallin e barnave” , tha tutje ai gjatë tubimit elektoral në këtë qytet.
Hamza ka premtuar 25 milionë euro bursa për studentët, derisa për Vitinë ku zgjodhi të ketë tubimin në ditën e pestë të fushatës tha se do të lidhet me autoudhën e do të ketë ujë të mjaftueshëm.
Kryetari i degës së PDK-së në Viti që është edhe kandidat për deputet nga kjo komunë tha se Kosova mundet më mirë veç me Bedri Hamzën kryeministër.
