Kryeministri i Kosovës, Albin Kurti, ka përkujtuar sot Presidentin historik të Kosovës, Dr. Ibrahim Rugova, në 19-vjetorin e vdekjes së tij. Kurti e cilësoi Rugovën si një figurë të urtë, paqësore dhe simbol të dialogut në politikë, që luajti një rol kyç në ndërkombëtarizimin e çështjes së Kosovës.
“Në fillet e angazhimit tim politik, më 1997, pata rastin ta takoj dy herë Presidentin Rugova. Ai më la përshtypjen e një lideri të jashtëzakonshëm, që mishëronte urtësinë dhe besnikërinë ndaj kërkesave për liri, pavarësi dhe demokraci për Kosovën,” shkroi Kurti.
Si kryetar i parë i Lidhjes Demokratike të Kosovës dhe Presidenti i parë i vendit, Rugova u shqua për qasjen e tij paqësore dhe retorikën e qëndrueshme, duke mbajtur një mesazh autentik dhe të besueshëm në kancelaritë perëndimore. Ai konsiderohet një nga figurat kyçe në historinë moderne të Kosovës, duke udhëhequr një periudhë të rëndësishme që përfshin rezistencën paqësore të viteve ’90 dhe ndërtimin e institucioneve të shtetit të ri.
Kurti përmendi edhe trashëgiminë politike, institucionale dhe studimore të Rugovës, duke theksuar se kjo trashëgimi vazhdon të studiohet dhe vlerësohet nga brezat e rinj. Ai përmendi veçanërisht një botim të fundit të studiuesit Bejtullah Destani, që përmbledh raportimet e shtypit italian dhe gjerman për Rugovën, si një mënyrë për të njohur më mirë figurën e tij nga perspektiva ndërkombëtare.
“Në shenjë mirënjohjeje dhe respekti, ne kujtojmë Presidentin Ibrahim Rugova dhe vizionin e tij të qartë për një Kosovë të lirë dhe demokratike,” përfundoi Kurti.
Presidenti Ibrahim Rugova ndërroi jetë më 21 janar 2006, në moshën 61-vjeçare duke lënë pas një trashëgimi të pasur për të ardhmen e Kosovës. /Kosovatimes/
