Presidentja e Republikës së Kosovës, Vjosa Osmani, ka nënshkruar sonte dekretin për faljen e pjesës së mbetur të dënimit të Arza Cakollit, të dënuar për “Rrezikim të Trafikut Publik”. Vendimi është marrë për shkaqe humanitare, pas shqyrtimit të propozimit nga Komisioni për Falje dhe në përputhje me procedurat ligjore.
Në njoftimin e Presidencës, thuhet se ky vendim është marrë për shkak të rrethanave të jashtëzakonshme, pasi e dënuara ka lindur foshnjën e saj të parë gjatë vuajtjes së dënimit dhe ndodhet në Qendrën Korrektuese për gra në Lipjan, së bashku me foshnjen e saj.
“Vendimi është marrë pas shqyrtimit të faktorëve të ndryshëm, duke përfshirë faktin që e dënuara nuk ka kryer asnjë vepër penale më herët dhe se vepra penale për të cilën është dënuar ka ndodhur pa dashje. Ajo ka kryer aksident pa qenë nën ndikim të alkoolit apo substancave të tjera”, thuhet në njoftimin e Presidencës.
Gjithashtu, janë marrë parasysh edhe sfidat shëndetësore të nënës dhe foshnjës, që kanë luajtur rol në vendimin për falje. E dënuara ka filluar mbajtjen e dënimit prej 1 vit e dy muaj burg në korrik të vitit 2024 dhe do të lirohej më 14 shtator të këtij viti.
“Duke marrë parasysh faktorët humanitarë dhe vlerësimet profesionale të të gjitha institucioneve relevante, Presidentja ka vendosur faljen e pjesës së mbetur të dënimit të saj”, thuhet më tej në njoftim. /Kosovatimes/
