Qeveria e Kosovës ka ndarë gjysmë milioni euro për mbështetjen e popullit palestinez në Gaza. Vendimi është marr sot në mbledhjen e 247-të të ekzekutivit kosovar.
Kryeministri i Kosovës Albin Kurti tha se mirëpresin marrëveshjen e arritur për armëpushim në Gaza. Tutje, në këtë mbledhje Kurti theksoi se gjatë mandatit të qeverisjes së tij, janë mbështetur shëndetësia, ushtria e fusha tjera.
Me këtë rast, kryeministri njoftoi se një pjesë e hapësirë në Batllavë do t’i jepet për shfrytëzim ushtrisë për ngritjen e kapaciteteve operacionale.
“Po shkojmë drejt fundit të mandatit tonë të parë qeverisës. Janë 319 projektligje të miratuara në këto vjet. Në këtë mandat, shëndetësia, veçanërisht mjekët kanë qenë në fokus. Kemi nevojë për shëndetësi që është në shërbim të qytetarit dhe mjekë që punojnë. Ndërsa, për Luginën nuk mjafton vetëm rritje e buxhetit, por po kujdesemi që profesione të ndryshme t’i përkrahim sipas nevojës, andaj po vazhdojmë mbështetjen për 30 specializantë që vinë nga vendet e rajonit. Ushtrinë tonë po e rrisim dhe po e forcojmë. Në ditën e rënies së heroit Zahir Pajazitit, do të japim në shfrytëzim të hapësirën në Batllavë për ngritjen e kapaciteteve operacionale të ushtrisë tonë”, tha kryeministri Kurti.
Kurti tha se gjithsej 319 projektligje janë të miratuara në këto katër vite të qeverisjes.
“Në këtë mandat shëndetësia e veçanërisht mjekët si profesion fisnik, kanë qenë në fokus të politikave tona. Kemi nevojë për shëndetësi që është në shërbim të qytetarit e mjekë që punojnë me devotshmëri dhe përkushtim. Përkrahjen tonë të parezervë po e vijojmë me shqyrtimin e kërkesës për pagesë të 224 specializantëve me vetëfinancim, në vlerë prej 2.3 milionë euro, për periudhën 1 janar deri 31 dhjetor të këtij viti. E mjekë tanë janë edhe bashkatdhetarët nga Lugina e Preshevës dhe Mali i Zi. Për Luginën nuk mjafton vetëm rritje e buxhetit me nga 1 milion euro vit pas viti, por po përkujdesemi që kategori e profesione të ndryshme t’i përkrahim sipas mundësive e krahas edhe nevojës. Andaj po e vazhdojmë mbështetjen edhe për 30 specializantë që vijnë nga vendet e rajonit, në vlerë prej 316 mijë euro, duke përfshirë pra specializantët nga Lugina e Preshevës dhe Mali i Zi”, tha ai.
Duke shtuar se ushtria po rritet dhe forcohet. “Më shumë dinjitet, më shumë kushte, më shumë buxhet e më shumë armatim po i shtohet Forcës së Sigurisë së Kosovës. E në ditën e ditëlindjes së heroit tonë, Zahir Pajaziti, pra me 1 nëntor të vitit të kaluar e kemi bërë pranim-dorëzimin e aeroportit të Dumoshit, ndërkaq sot në datën e rënies së Zahir Pajazitit do të marrim vendim për dhënien në shfrytëzim për ushtrinë të hapësirës në Batllavë. Për nevoja të Ministrisë së Mbrojtjes dhe vetë Forcës së Sigurisë së Kosovës, do të shfrytëzojmë pronat e Agjencisë së Pyjeve të Kosovës, përkatësisht pronës shoqërore në Batllavë në sipërfaqe prej 100 hektarësh, e cila do të vihet në shfrytëzim për ngritjen e kapaciteteve operacionale të ushtrisë sonë”, tha ai.
