Kryeministri i Kosovës, Albin Kurti, ka thënë për britanikun Guardian se heqja e barrikadave në veri të Kosovës nuk mund të përjashtojë viktimat.
Ai po ashtu i ka sqaruar Kurtit se serbët nga veriu i Kosovës para dhjetë ditësh kishin ngritur barrikada, të cilat ende nuk janë hequr.
Kurti tha se ishte i shqetësuar se situata e tensionuar mund të përshkallëzohet “në favor të presidentit rus Vladimir Putin, duke pasur parasysh se forcat ruse dhe serbe kanë kryer 104 stërvitje të përbashkëta ushtarake në vitin 2021”.
“Shqetësimi ynë është se heqja e barrikadave nuk mund të përjashtojë viktimat. Dhe kjo është arsyeja pse ne duam të jemi sa më të kujdesshëm që të sigurohemi që nuk do të ketë destabilizime dhe se do të ketë paqe dhe siguri relative. Megjithatë, ne nuk mund të lejojmë përgjithmonë shkelje të ligjshmërisë dhe kushtetutshmërisë. Pra, po, kjo duhet të përfundojë, sa më shpejt aq më mirë”, tha Kurti.
Ai theksoi se BE dhe SHBA janë dakord që barrikadat duhet të hiqen.
Lideri i Kosovës shtoi se është pajtuar me KFOR-in se duhet më shumë kohë për të bindur ata që janë në barrikada të tërhiqen, por se nuk mund të lejohet të qëndrojnë më gjatë.
