Numri i kontakteve midis Moskës dhe Uashingtonit për zgjidhjen e luftës në Ukrainë është rritur, tha sekretari i shtypit i Kremlinit, Dmitry Peskov. Kështu e komentoi ai deklaratën e presidentit amerikan Donald Trump për negociata “shumë konstruktive” për këtë temë.
“Ka vërtet kontakte midis departamenteve individuale dhe ato janë intensifikuar kohët e fundit. Por nuk mund t’ju them asnjë detaj tjetër, nuk kam asgjë tjetër për të thënë,” citojnë agjencitë ruse të lajmeve të ketë thënë Peskov.
Më herët të martën, presidenti amerikan Trump tha se administrata e tij ishte në “bisedime shumë konstruktive për Ukrainën” dhe se do të “bënte gjithçka” për të ndaluar luftën. Ai e quajti atë një “masakër”, citon Zëri i Amerikës të ketë thënë kreu i shtetit.
“Ne po flasim me rusët, po flasim me udhëheqjen ukrainase”, tha Trump kur u pyet nga një gazetar për një plan paqeje për Ukrainën. Ai nuk u fut në detaje.
