Presidentja e Kosovës, Vjosa Osmani, ka mbajtur një fjalim në Lutjet e Mëngjesit në Washington, ku shprehu mirënjohjen e popullit të Kosovës ndaj Shteteve të Bashkuara për rolin e tyre vendimtar në çlirimin e vendit.
Gjatë fjalës së saj, Osmani tha se populli i Kosovës ka kaluar përmes vuajtjeve të mëdha gjatë luftës, por gjithmonë është mbështetur te besimi dhe shpresa për liri. Ajo rikujtoi kohën kur, si fëmijë e luftës dhe refugjate, përjetoi shkatërrimin e shtëpisë dhe jetës familjare nga forcat e regjimit serb të Millosheviçit.
“Edhe në momentet më të errëta, ne u kapëm pas një të vërtete themelore: Zoti është i madh dhe do të na udhëheqë drejt lirisë. Ne lutëm Zotin për një mrekulli, dhe Zoti na dërgoi Amerikën,” tha Osmani.
Presidentja theksoi rolin e madh të Shteteve të Bashkuara dhe vendeve aleate në ndalimin e gjenocidit dhe shpëtimin e mijëra jetëve të pafajshme. Ajo u shpreh mirënjohëse për të gjithë ata që, përmes lutjeve dhe veprimeve, qëndruan në krah të Kosovës në momentet më të vështira.
“Ne nuk do ta harrojmë kurrë që liria e Kosovës u mbrojt nga zëra avokues në Shtetet e Bashkuara, shumica prej tyre të udhëhequr nga besimi. Nuk do t’i harrojmë kurrë lutjet e panumërta të anëtarëve të Kongresit çdo mëngjes të së enjtes në vitin 1999 dhe mbështetjen nga të gjitha besimet në Amerikë,” tha ajo.
“Faleminderit që zgjodhët njerëzimin, faleminderit që na shpëtuat jetën, faleminderit që qëndruat për lirinë”, shtoi presidentja.
Osmani theksoi se Amerika udhëhoqi rrugën dhe bota demokratike e ndoqi në mbështetje të lirisë së Kosovës. Ajo citoi Presidentin Rugova, i cili shpesh thoshte: “Ne kemi besuar tek Zoti dhe ky besim na ka mbajtur gjallë.”
Presidentja Osmani tha se Kosova do të mbetet gjithmonë një partner i përkushtuar ndaj vlerave demokratike dhe paqes.
Lutjet e Mëngjesit janë një traditë vjetore në Washington, ku liderë nga e gjithë bota mblidhen për të reflektuar mbi besimin, paqen dhe drejtësinë.
