Procesi zgjedhor në Kosovë u përmbyll i qetë e pa incidente, teksa u vlerësua nga të gjitha partitë si demokratik. Lëvizja Vetëvendosje e shpalli fitoren dhe paralajmëroi krijimin e qeverisë. PDK vlerësoi rritjen e saj, derisa nuk dha qëndrim për koalicione. LDK u shpreh se rezultati nuk ishte ai që pritej, derisa AAK vlerësoi se fitorja është e opozitës.
VV shpalli fitoren, thotë se do ta krijojë qeverinë Kurti 3
Lideri i Lëvizjes Vetëvendosjes, Albin Kurti e ka shpallur fitoren e subjektit të tij politik me partnerët e koalicionit, Guxo dhe Alternativa në zgjedhjet e mbajtura më 9 shkurt. Ai në mesnatë u shfaq në sheshin e kryeqytetit ku ishin mbledhur mbështetësit e Lëvizjes Vetëvendosje për ta festuar fitoren.
Ai shprehu falënderime për të gjithë votuesit që mbështetën partinë e tij, duke e cilësuar këtë si një kurorëzim të punës njëmujore të fushatës, të punës katërvjeçare të qeverisjes dhe të punës 20-vjeçare të Vetëvendosjes.
“Koalicioni ynë fitues do ta formojë qeverinë e re Kurti 3, dhe në këtë mënyrë do t’i vazhdojmë edhe punët e nisura. Qytetarët e Kosovës e kanë dëshmuar rezistencën e tyre kundër një lufte të paparë hibride që është bërë kundër koalicionit tonë. Ka pasur premtime edhe irracionale. Përkundër kësaj LVV fitoi dhe ne jemi subjekti fitues që do ta formojë qeverinë e ardhshme”, ka thënë ai.
Kurti vlerësoi procesin zgjedhor, duke theksuar se ai ishte një proces i lirë dhe i ndershëm, pa incidente, dhe falënderoi mekanizmat shtetërorë, përfshirë edhe policinë, për organizimin e tij. Ai tha se ky ishte një shembull i demokracisë, ku procesi ishte i qetë dhe transparent, dhe sipas tij nuk kishte se si të ndodhte ndryshe, pasi Vetëvendosje ishte në pushtet.
“Ne do ti vazhdojmë punët e mira, do të bëjmë edhe shumë të tjera, në përputhje me zotimet tona, për të gjithë qytetarët cep më cep Kosovës” tha ai.
PDK i gëzohet rritjes elektorale
Partia Demokratike e Kosovës e ka vlerësuar të suksesshëm rezultatin në zgjedhjet e 9 shkurtit. Zëdhënësi i fushatës së PDK-së, Blerand Stavileci, ka thënë se rezultatet dëshmojnë se shumica e qytetarëve ia kanë kthyer shpinën qeverisë Kurti dhe, sipas tij, po kërkojnë qeveri të re.
“PDK-ja ka arritur rezultat të madh, është konfirmuar si forca e dytë më e madhe në vend me mbi 200 mijë vota. Falënderojmë qytetarët që votuan për PDK-në. Ky është sukses i pamohueshëm dhe mesazh i fortë për ne. Shumica e qytetarëve ia kanë kthyer shpinën kësaj qeverie, pasi nuk e kanë shumicën. Rezultatet tregojnë se qytetarët kërkojnë qeveri të re”, ka thënë Stavileci.
Sa i përket mundësisë së përfshirjes së PDK-së në koalicionet e mundshme për formimin e qeverisë së re, Stavileci ka thënë se për këtë do të dalin me qëndrim kryetari i këtij subjekti, Memli Krasniqi dhe kandidati për kryeministër, Bedri Hamza.
LDK e pakënaqur me rezultatin, e vlerëson procesin
Kryetari i Lidhjes Demokratike të Kosovës, Lumir Abdixhiku, ka thënë se përkundër rritjes së subjektit të tij krahasuar me zgjedhjet e para katër vjetëve, rezultati prej 18.1 për qind nuk është i kënaqshëm. E përgjegjësinë për fushatën dhe për këtë rezultat ka thënë se e merr vetë ai.
“Përgjegjësinë për këtë rezultat e marrë në tërësi unë, edhe për fushatën, edhe për drejtimin e partisë dhe për këtë i jap llogari vetëm LDK-së dhe qytetarëve që kanë votuar për LDK-në”, ka thënë ai.
Ai tutje ka thënë se nëse populli këtë herë nuk e pa atë si kryeministër, atëherë do të jetë i lumtur që jetë pjesë e opozitës së ardhshme në Kuvendin e Kosovës.
AAK thotë se zgjedhjet i fitoi opozita
Kryetari i Aleancës për Ardhmërinë e Kosovës, Ramush Haradinaj, në konferencën e parë pas përfundimit të procesit zgjedhor, ka shprehur shpresën që koalicioni i partisë së tij me Nismën dhe partnerët do të arrijë rezultat dyshifror në përqindjen e votave. Ai ka vlerësuar se opozita i ka fituar këto zgjedhje.
“Falënderoj qytetarët e Kosovës për kulturën e treguar, na kanë bërë krenar për mënyrën se si ka vijuar procesi i votimit. Falënderojmë aktivistët por edhe të gjithë ata që votuan për koalicionin 137, për Kosovën Fituese. Tashmë veçse kemi rezultatet e para, janë preliminare. Jemi të sigurt që kemi rezultat dyshifror. Ajo që më gëzon është fakti se opozita i ka fituar këto zgjedhje. I uroj opozitës fitoren dhe pres me padurim të bashkëpunojmë për krijimin e qeverisë së opozitës në Kosovë”, ka thënë Haradinaj të dielën në mbrëmje.
Megjithatë, në bazë të të dhënave të KQZ-së nga rreth 90 përqind e numërimit të votave del që AAK me partnerët është nën shifrën e synuar nga Haradinaj, pasi ka 7.56%.
