Kryetari i Aleancës për Ardhmërinë e Kosovës, Ramush Haradinaj, ka shprehur pakënaqësinë e tij lidhur me rezultatin e zgjedhjeve për koalicionin në të cilin ai ishte i nominuar për kryeministër.
Megjithatë, ai tha se kjo nuk do ta ndalë që Kosovës t’i japin një qeveri opozitare, për çka tha se nuk ka asnjë kusht karshi partive tjera opozitare, derisa ka përjashtuar mundësinë që të ketë koalicion me lëvizjen Vetëvendosje e liderin e këtij subjekti politik, që doli i pari në këto zgjedhje.
“E pranoj që rezultati nuk është i mirë, nuk jam i kënaqur me këtë rezultat. Do të reflektoj unë, Aleanca, në këtë rezultat i cili nuk është i mirë, e për fat të keq nuk është i mjaftueshëm për ta ndihmuar Kosovën në këto procese që kemi para vetës. Por, ajo që është e vërtetë, që nuk ndryshon, ne do ta vazhdojmë këtë rrugëtim për t’i dhënë Kosovës qeverinë opozitare edhe në këtë rrethanë çfarë jemi”
Haradinaj foli edhe për Statutin e Asociacionit që tha se u ka treguar qytetarëve se i njëjti duhet të procedohet në kushtetuese, ndonëse e ka ditur se kjo nuk do ti sillte vota.
“Me kënaqësi kishim bashkëpunuar me subjektet politike shqiptare opozitare, jemi të gatshëm për të, pa asnjë kusht për të ecur përpara. Nëse e krijomë qeverinë si opozitë, që është e mundur dhe unë shpresoj që do të ndodhë. Unë nuk i kam mashtruar qytetarët e Kosovës, kam deklaruar me kohë se e kemi situatën e tillë që duhet ta procedojmë Statutin e Asociacionit të komunave me shumicë serbe në kushtetuese, edhe pse e kam ditur se nuk do të më sjellë vota. Por, duke pasur parasysh zhvillimet globale, veçanërisht zgjedhjen e presidentit Trump, unë e di që nuk kemi kohë për të humbur. Unë i di pasojat për vendin. Sot nuk më shqetëson rezultati i Aleancës, por ajo që më shqetëson më shumë është Kosova”, tha Haradinaj para gazetarëve.
