Kryeministri i Republikës së Kosovës, Albin Kurti, ka udhëtuar sot për në Mynih të Gjermanisë për të marrë pjesë në konferencën tre ditore të sigurisë – Munich Security Conference 2025.
Kjo gjë u bë e ditur në njoftimin e Zyrës së Kryeministrit.
Konferenca e 61-të e Sigurisë e Mynihut (MSC) do të mbahet nga 14 deri më 16 shkurt 2025, në Hotel Bayerischer Hof në Mynih. Ky event prestigjioz do të ofrojë një platformë për debatet e nivelit të lartë mbi sfidat më të mëdha të politikës së jashtme dhe sigurisë që përballen kombet sot.
MSC është një nga ngjarjet më të rëndësishme ndërkombëtare që mblidhen liderë të shteteve, ekspertë të politikës së jashtme, diplomatë dhe analistë të sigurisë nga e gjithë bota për të diskutuar çështje të sigurisë globale, politikës ndërkombëtare dhe sfidave të sigurisë. Konferenca mbahet çdo vit në Mynih, Gjermani, dhe është një forum për të shqyrtuar zhvillimet dhe problemet më urgjente, siç janë konfliktet ndërkombëtare, terrorizmi, ndryshimet klimatike dhe çështjet e mbrojtjes.
