Një zyrtar i lartë i Vatikanit ka hedhur poshtë planin e presidentit amerikan Donald Trump për të zhvendosur palestinezët nga Gaza, duke thënë se “popullsia palestineze duhet të qëndrojë në tokën e tyre”.
“Një nga pikat themelore të Selisë së Shenjtë është: jo deportime,” tha Sekretari i Shtetit Pietro Parolin në margjinat e një takimi midis Italisë dhe Vatikanit, raportoi agjencia e lajmeve ANSA.
Dëbimi i palestinezëve do të shkaktonte tensione rajonale dhe “nuk do të kishte kuptim” sepse vendet fqinje, si Jordania, e kundërshtojnë atë, vazhdoi ai.
“Zgjidhja, për mendimin tonë, janë dy shtete, sepse kjo do të thotë edhe t’i japësh shpresë popullatës”, shtoi ai.
Presidenti amerikan ka propozuar marrjen e kontrollit të Rripit të Gazës të shkatërruar nga lufta dhe zhvendosjen e më shumë se 2 milionë banorëve të tij në Jordani dhe Egjipt, një plan që ekspertët thonë se do të shkelte ligjin ndërkombëtar, por që është quajtur “revolucionar” nga kryeministri izraelit Benjamin Netanyahu.
Këtë javë, Papa Françesku kritikoi gjithashtu planet e Trump për dëbimet masive të emigrantëve të paligjshëm në Shtetet e Bashkuara.
Në një letër drejtuar peshkopëve amerikanë, kreu i Kishës Katolike i quajti dëbimet një “krizë të madhe” dhe tha se kthimi i njerëzve në vendet e tyre të origjinës “minon dinjitetin” e emigrantëve.
Shefi i kufirit të Trump, Tom Homan iu përgjigj Papës: “Do të doja që ai të qëndronte me Kishën Katolike… dhe të merremi me kontrollin e kufirit”.
