Kryeministri i Kosovës, Albin Kurti, ka zhvilluar një sërë takimesh të rëndësishme gjatë edicionit të 61-të të Konferencës së Sigurisë në Munih, ku çështjet e sigurisë globale dhe partneritetet strategjike ishin në qendër të vëmendjes.
Në takimin me Gjenerallejtënantin amerikan Michael Fenzen, Kurti theksoi gatishmërinë e Kosovës për t’u përfshirë në nisma globale të udhëhequra nga Shtetet e Bashkuara të Amerikës.
Me Kryeministren e Islandës, Kristrún Frostadóttir, ai diskutoi për përfitimet e Marrëveshjes për Tregti të Lirë midis Kosovës dhe vendeve anëtare të EFTA-s, e cila u nënshkrua në janar.
Marrëdhëniet bilaterale dhe bashkëpunimi në mbrojtje ishin temat kryesore të bisedës me ministrin e Jashtëm të Turqisë, Hakan Fidan, ndërsa me ministrin e Mbrojtjes së Kroacisë, Ivan Anušić, u shqyrtuan mundësitë e partneritetit në industrinë ushtarake.
Gjatë takimit me ministrin e Financave të Gjermanisë, Jörg Kukies, u diskutua mbi rritjen e shkëmbimeve tregtare dhe investimeve të huaja direkte nga Gjermania duke forcuar më tej marrëdhëniet ekonomike dhe të sigurisë mes dy vendeve.
Kurti u takua gjithashtu me emisarin e ri të BE-së për Dialogun Kosovë-Serbi, Peter Sørensen, si dhe me përfaqësues të tjerë ndërkombëtarë duke përfshirë Kryetaren e Grupit të Miqësisë Kosovë-Finlandë në parlamentin finlandez, Tytti Tuppurainen, dhe Drejtorin Ekzekutiv të Komitetit Amerikano-Hebraik, Ted Deutch.
Përveç takimeve zyrtare, Kryeministri i Kosovës mori pjesë në diskutime të ndryshme, duke përfshirë darkën e shtruar nga Kancelaria e Bavarisë, drekën e organizuar për Ukrainën, tryezën mbi taktikat hibride ruse në Evropë dhe drekën e punës të organizuar nga Këshilli Atlantik.
Gjatë vizitës në Munih, Kurti theksoi rëndësinë e diplomacisë aktive dhe partneriteteve strategjike për të forcuar pozicionin e Kosovës në arenën ndërkombëtare. /Kosovatimes/
