Federata Pan-Shqiptare e Amerikës “Vatra” zhvilloi një vizitë zyrtare në Departamentin e Shtetit Amerikan.
Kryetari i Vatrës Elmi Berisha, sekretari Pashko Camaj dhe aktivisti Bardh Tomaj u pritën nga Colleen Hyland, drejtoreshë e Zyrës së Europës Jugore Qendrore në Departamentin e Shtetit Amerikan.
Gjatë takimit u diskutua për zgjedhjet dhe proceset demokratike në Kosovë, formimi i qeverisë dhe forcimi i bashkëpunimit mes Kosovës dhe SHBA-së.
“Tema të diskutimit ishin zgjedhjet dhe proceset demokratike në Kosovë, nevoja për formimin e qeverisë dhe institucioneve ligjzbatuese, nevoja e forcimit të bashkëpunimit mes Kosovës dhe Shteteve të Bashkuara të Amerikës për një zhvillim të qëndrueshëm dhe integrim sa më të shpejtë euroatlantik”, thuhet në njoftimin e Vatrës, të publikuar në faqen e gazetës “Dielli”.
Po ashtu, u theksua roli i Vatrës në forcimin e lidhjeve shqiptaro-amerikane dhe zhvillimin e bashkëpunimit mes institucioneve shtetërore amerikane dhe atyre të Kosovës dhe Shqipërisë.
Në njoftimin e federatës theksohet se Hyland vlerësoi rolin e Vatrës dhe theksoi rëndësinë e vazhdimit të bashkëpunimit të ngushtë. /Kosovatimes/
