Një ekip shkencëtarësh kinezë ka zbuluar një koronavirus të ri te lakuriqët e natës, i cili paraqet rrezikun e transmetimit nga kafshët te njerëzit. Ky virus përdor të njëjtin receptor njerëzor si ai që shkakton Covid-19.
Studimi, i publikuar nga “Cell”, është kryesuar nga virologia e njohur Shi Zhengli, e cila ka bërë kërkime të gjera mbi koronavirusët te lakuriqët e natës. Ky studim është realizuar në bashkëpunim me Laboratorin e Guangzhou, Akademinë e Shkencave të Guangzhou, Universitetin e Wuhanit dhe Institutin e Virologjisë në Wuhan.
Origjina e Covid-19 mbetet ende një çështje e diskutueshme, por disa studime sugjerojnë se ai mund të ketë kaluar nga lakuriqët te njerëzit përmes një kafshe ndërmjetëse. Shi Zhengli ka mohuar çdo lidhje të institutit të Wuhanit me përhapjen e pandemisë.
Koronavirusi i ri i përket një linje të HKU5, e cila u identifikua për herë të parë në një lakuriq japonez në Hong Kong. Ai është pjesë e merbekovirusëve, ku përfshihet edhe virusi që shkakton Sindromën e Frymëmarrjes së Lindjes së Mesme (MERS), shkruan A2 CNN. Studimi zbuloi se ky virus mund të lidhet me enzimën e konvertimit të angiotenzinës (ACE2) tek njerëzit, ashtu si SARS-CoV-2.
Shkencëtarët raportojnë se ky virus është në gjendje të infektojë qelizat njerëzore dhe indet e kultivuara që imitojnë organet e frymëmarrjes dhe të tretjes. Megjithatë, një studim i mëparshëm nga Universiteti i Uashingtonit dhe Universiteti i Wuhanit kishte arritur në përfundimin se ky virus nuk lidhej në mënyrë efikase me receptorët njerëzorë ACE2. Ekipi i Shi Zhengli ka zbuluar se lloji i ri i virusit është më i përshtatur ndaj ACE2 njerëzor në krahasim me variantin e mëparshëm të HKU5, çka e bën të mundur transmetimin ndërmjet llojeve të ndryshme.
Pavarësisht kësaj, studiuesit theksojnë se efikasiteti i këtij virusi në infektimin e njerëzve është shumë më i ulët se ai i Covid-19. Për këtë arsye, ata sugjerojnë monitorim të mëtejshëm, por nuk e konsiderojnë një rrezik të lartë për popullatën njerëzore.
