Hendbollistja e Kombëtares së Kosovës, Mirela Gjikokaj, vazhdon të ketë suksese me skuadrën e njohur norvegjeze, Storhamar.
Të shtunën Storhamari u kualifikua për në plejof të Ligës së Kampionëve.
Në xhiron e fundit të stinorit të rregullt, Storhamari u përball me Metzin në Francë në praninë e 4228 shikuesve. Metzi fitoi me rezultat 24:20, ndërsa Gjikokaj e kishte një gol të shënuar. Ajo kishte hapësirë të konsiderueshme, ndërsa kontribuoi në sulm e në mbrojtje. Nga afër paraqitjen e Gjikokajt e përcolli selektori i Kosovës, Agron Shabani.
Përkundër humbjes, Storhamari u kualifikua në plejof nga vendi i gjashtë i Grupit A.
Skuadra rumune, Gloria Bistrita, humbi nga CSM Bukureshti dhe kjo i mundësoi Storhamarit që të avancojë.
Metzi francez i fitoi grupin A duke shënuar 13 fitore e një barazim. Bashkë me skuadrën hungareze, FTC-Rail Cargo Hungaria, avancuan direkt në çerekfinale.
Në plejof u kualifikuan Bukureshti, Krim Mercatori i Sllovenisë, Podravka e Kroacisë dhe Storhamari norvegjez.
Në plejof Storhamari do të përballet me skuadrën daneze Odense. Dy ndeshjet zhvillohen pas një muaji.
Për herë të parë një lojtare e Kosovës po paraqitet në Ligën e Kampionëve./Kosovatimes/
