Presidenti amerikan Donald Trump njoftoi dje se Shtetet e Bashkuara do të fillojnë të shesin “bileta të arta” me vlerë pesë milionë dollarë për të huajt që duan të shpërngulen në SHBA dhe të hapin vende pune. “Njerëz të pasur do të vijnë në këtë vend duke blerë këtë biletë. Ata do të jenë të pasur, do të jenë të suksesshëm, do të shpenzojnë shumë para, do të paguajnë shumë taksa dhe do të punësojnë shumë njerëz”, u tha presidenti amerikan gazetarëve në Shtëpinë e Bardhë.
“Është disi si një kartë jeshile” për qëndrim të përhershëm në Shtetet e Bashkuara, “por në një nivel më të lartë të sofistikimit”, tha Trump, duke shtuar se “karta e artë” do t’u jepte mbajtësve të saj akses “drejt shtetësisë” në planin afatgjatë.
Trump tha se programi i ri i imigracionit mund të fillojë të funksionojë për rreth dy javë. “Golden Cards” do të zëvendësojë programin e emigracionit “EB-5”, i cili u mundësonte investitorëve të huaj me shuma të mëdha parash të krijonin vende pune në Shtetet e Bashkuara dhe të fitonin qëndrim të përhershëm në vend.
Sekretari amerikan i Tregtisë, Howard Lutnick tha se programi ekzistues ishte i prirur për mashtrim dhe ishte “një mënyrë për të marrë një kartë jeshile me një kosto të ulët”.
