Administrata Trump ka fajësuar presidentin ukrainas Volodymyr Zelensky për një incident të pakëndshëm që ndodhi në Zyrën Ovale të premten dhe shprehu pakënaqësinë që Zelensky e shtyu çështjen e garancive të sigurisë edhe pse SHBA-ja e kishte bërë të qartë se dëshironte të negocionte më vonë për të, sipas burimeve të njohura me situatën, raporton Guardian .
Sipas këtyre informacioneve, zyrtarët amerikanë kanë njoftuar paraprakisht palën ukrainase se Trump dëshironte të nënshkruante një marrëveshje ekonomike këtë javë, ndërsa garancitë e sigurisë do të trajtoheshin më vonë.
Njerëzit e Trump: Zelensky po jepte mësime, ne e paralajmëruam që të mos e bënte këtë
Trump e konsideroi marrëveshjen për mineralet si hapin e parë drejt një partneriteti më të gjerë ekonomik dhe u tha bashkëpunëtorëve të tij se SHBA praktikisht po i jepte Ukrainës një garanci sigurie, sepse përmes kësaj marrëveshje do të kishte një interes të drejtpërdrejtë në suksesin ekonomik të Ukrainës.
Njerëzit e Trump besonin se e gjithë kjo i ishte përcjellë qartë palës ukrainase, përfshirë këshillën që senatorët amerikanë i dhanë Zelenskyt të premten në mëngjes – të lavdëronte Trump dhe të mos përmendte hapur kërkesat për garanci më të forta sigurie.
Megjithatë, sipas bashkëpunëtorëve të Trump, Zelensky nuk e dëgjoi atë këshillë. Gjatë takimit, ai shprehu dyshime për pikëpamjet e zëvendëspresidentit JD Vance për arritjen e paqes me Rusinë, dhe më pas, sipas mendimit të njerëzve të Trump, i dha atij një mësim për agresionin e Rusisë kundër Ukrainës, duke i kujtuar se gjithçka filloi në vitin 2014 me aneksimin e Krimesë.
