Shtetet e Bashkuara po pezullojnë ndihmën ushtarake për Ukrainën disa ditë pasi presidenti amerikan Donald Trump u përplas me presidentin ukrainas Volodymyr Zelensky në Zyrën Ovale, konfirmoi një zyrtar i Shtëpisë së Bardhë për Reuters të hënën.
“Presidenti e ka bërë të qartë se ai është i fokusuar në paqe. Ne kemi nevojë që partnerët tanë të jenë të përkushtuar ndaj këtij qëllimi gjithashtu. Ne po ndalojmë dhe shqyrtojmë ndihmën tonë për t’u siguruar që ajo kontribuon në një zgjidhje,” tha zyrtari. Zyra e Zelensky nuk iu përgjigj menjëherë kërkesës së Reuters për koment.
“Kjo nuk është një ndërprerje e përhershme e ndihmës, është një pauzë,” citoi Fox News të thoshte një zyrtar i administratës Trump. Bloomberg raportoi se dërgimi i të gjitha pajisjeve ushtarake amerikane që nuk janë aktualisht në Ukrainë është ndalur, duke përfshirë armët në tranzit në aeroplanë dhe anije ose ato që presin në zonat tranzite në Poloni.
Reagimi i parë i Ukrainës: Ne kurrë nuk e imagjinonim këtë në makthin tonë më të keq
Oleksandr Merezhko, një ligjvënës ukrainas nga partia e Presidentit Zelensky, tha se ishte “i tronditur” nga lajmi.
Duke folur për BBC Newsday, ai tha: “Ajo që po ndodh është e pabesueshme. As në makthet e mia më të këqija nuk mund ta imagjinoja se Trump mund të ndalonte ndihmën ushtarake për Ukrainën në një kohë kur ne kemi më shumë nevojë për të.”
Merezhko beson se presidenti amerikan Donald Trump po përpiqet të largojë Ukrainën dhe Evropën në mënyrë që të arrihet një marrëveshje me Rusinë.
“Unë mendoj se zoti Trump duhet të mendojë seriozisht se si do të mbahet mend në histori. Për mua kjo është një ditë që do të hyjë në histori si e turpshme”, përfundoi ai.
