Ka shkuar në dy numri i vdekjeve pas aksidentit të sotëm me fatalitet në aksin rrugor Domoroc – Hodonoc të komunës së Ranillugut. Fillimisht ishte dyshuar se ishte vetaksident, por pas këqyrjes së kamerave nga ana e policisë dhe mbledhjes së provave, dyshohet se ato u rrokullisën duke i ikur përplasjes me kamionin.
Sipas policisë, dyshimet janë se drejtuesi bëri kthim të pasigurt duke penguar automjetin në të cilin ndodheshin tashmë dy nga viktimat. Këtë e konfirmoi për RTKlive, zëdhënësi i policisë për rajonin e Gjilanit, Ismet Hashani.
“Në emergjencën edhe përkundër ndihmës së ofruar nga ana e personelit mjekësor po ashtu ka ndërruar jetë edhe njëra nga pasagjeret, vdekjen e së cilës e ka konstatuar mjeku kujdestar gjersa pasagjerja e tretë është dërguar në Qendrën Klinike Universitare në Prishtinë për tretman të mëtejmë”, konfirmoi për RTKlive, zëdhënësi i policisë për rajonin e Gjilanit, Ismet Hashani.
Ai ka treguar se si erdhi deri te dyshimet se nuk ishte vetaksident, çka ishte menduar fillimisht.
“Si rezultat i veprimeve hetimore nga Njësiti Rajonal i Komunikacionit Rrugor, shikimit të vendit të ngjarjes, këqyrjes së kamerave dhe mbledhjes së provave të tjera, me vendim të Prokurorit të Shtetit është ngritur dyshimi se nuk kemi të bëjmë me vet aksident, por me aksident trafiku ku dyshohet se drejtuesi i kamionit me targa vendore mashkull Kosovar i vitit të lindjes 1970 si pasojë e kthimit të pasigurt ka penguar lëvizjen e automjetit i cili ishte në tejkalim, ku drejtuesja e automjetit nga mos përshtatja e shpejtësisë me kushtet e rrugës humbë kontrollin mbi mjet në tentativë për shmangie të goditjes së kamionit dhe përfundon e rrokullisur jashtë rrugës”, tha tutje Hashani.
Hashani, tregoi se i dyshuari me vendim të Prokurorit të Shtetit është ndalur për 48 orë gjersa trupat e pajetë të viktimave janë dërguar në Institutin e Mjekësisë Ligjore për Obduksion.
Ai tha se hetuesit policor po vazhdojnë hetimet për rrethanat e këtij aksidenti.
