Ministri GJERMAN i Mbrojtjes Boris Pistorius ka kritikuar një telefonatë mes presidentit amerikan Donald Trump dhe presidentit rus Vladimir Putin, duke e quajtur atë një “dështim”.
Pistorius i bëri këto deklarata në një program të ZDF. Sulmet ruse në infrastrukturën ukrainase “nuk u ndalën pas kësaj telefonate të supozuar të madhe”, tha Pistorius.
Pistorius: Putin po luan një lojë.
“Putini po luan një lojë këtu dhe jam i sigurt se presidenti amerikan nuk do të jetë në gjendje të qëndrojë pasiv për një kohë të gjatë,” tha ai. Pistorius tha gjithashtu se do të vijë një kohë kur Trump “do të reagojë, do të duhet të reagojë” për të ruajtur “forcën dhe prestigjin” e SHBA.
Biseda mes Trump dhe Putinit u zhvillua mbrëmë dhe nuk rezultoi me një armëpushim të plotë 30-ditor, siç kishin propozuar amerikanët. Megjithatë, Putin ra dakord për një pauzë të përkohshme në sulmet ndaj infrastrukturës energjetike. Edhe Kievi ra dakord për të njëjtën gjë. Megjithatë, sot kanë ndodhur tashmë sulme nga të dyja palët.
Ministri gjerman Pistorius tha se ishte një “gabim” përjashtimi i Evropës nga bisedimet midis Trump dhe Putin, sepse “në fund, paqja, nëse vjen, duhet të sigurohet edhe në tokën evropiane”.
Trump e vlerësoi bisedën me Putinin si “shumë të mirë dhe produktive”.
