Zyrtarët perëndimorë akuzojnë Rusinë për 59 sulme dhe incidente të tjera në të gjithë Evropën

Zyrtarët perëndimorë akuzojnë Rusinë dhe përfaqësuesit e saj për orkestrimin e dhjetëra sulmeve dhe incidenteve të tjera në të gjithë Evropën që nga fillimi i pushtimit rus të Ukrainës tre vjet më parë, sipas të dhënave të përpiluara nga The Associated Press.

Zyrtarët thonë se fushata e përçarjes është një zgjatje e luftës së presidentit rus Vladimir Putin, që synon të mbjellë ndarje në shoqëritë evropiane dhe të minojë mbështetjen për Ukrainën.

Agjencia Associated Press thotë se ka dokumentuar 59 incidente në të cilat qeveritë evropiane, prokurorët, agjencitë e inteligjencës ose zyrtarë të tjerë perëndimorë kanë fajësuar Rusinë, grupet e lidhura me Rusinë ose aleatin e saj Bjellorusinë për sulme hakerimi, përhapje propagande, planifikimin e atentateve ose për vandalizëm, zjarrvënie, sabotim ose spiunim që nga fillimi i pushtimit në 20 shkurt22.

Incidentet variojnë nga mbushja e tubave të shkarkimit të makinave me shkumë në Gjermani dhe komploti për të vendosur eksplozivë në avionë mallrash, tek vënia e zjarrit në dyqane dhe muzeume, te sulmet me haker ndaj politikanëve dhe infrastrukturës së rëndësishme dhe spiunimi nga një grup i dënuar në MB.

Kreu i shërbimit të inteligjencës së jashtme britanike, Richard Moore, tha në nëntor se ishte një “fushatë mahnitëse e pamëshirshme”.

Përfshirja ruse shpesh është e vështirë të provohet dhe Kremlini mohon se qëndron pas një fushate sabotimi kundër Perëndimit, por gjithnjë e më shumë qeveria po ia atribuon publikisht sulmet Rusisë.

James Appathurai, një zyrtar i NATO-s i ngarkuar me përgjigjen e aleancës ndaj kërcënimeve të tilla, i tha AP se fushata ka një qëllim të dyfishtë – njëri është të krijojë “trazira politike” dhe të minojë mbështetjen e qytetarëve për qeveritë e tyre dhe tjetri është të minojë mbështetjen për Ukrainën.

Përveç ekspertëve, AP foli me 15 zyrtarë gjatë hetimit të saj, duke përfshirë dy kryeministra dhe përfaqësues të pesë shërbimeve evropiane të inteligjencës, tre ministrive të mbrojtjes dhe NATO-s.

Ekspertët thonë se fushata ruse është veçanërisht shqetësuese në një kohë kur mbështetja e vazhdueshme e SHBA për Ukrainën është e pasigurt dhe kur aleatët evropianë po vënë në pikëpyetje besueshmërinë e Uashingtonit si një partner dhe aleat i sigurisë.

Incidentet janë të ndryshme dhe shumica e tyre ndodhën në vende që ofrojnë mbështetje të konsiderueshme për Ukrainën.

Disa incidente kishin potencial për pasoja katastrofike, duke përfshirë viktima masive – për shembull, kur pako shpërthyen në magazina në Gjermani dhe MB. Zyrtarët perëndimorë kanë thënë se dyshojnë se pakot janë pjesë e një komploti më të gjerë të inteligjencës ruse për të vendosur bomba në aeroplanët e mallrave që fluturojnë për në SHBA dhe Kanada.

Në një rast, agjencitë perëndimore të inteligjencës pretendojnë se kanë zbuluar një komplot rus për të vrarë kreun e një prodhuesi të madh gjerman të armëve që furnizon me armë Ukrainën.

Autoritetet evropiane po hetojnë disa raste të dëmtimit të infrastrukturës së telekomunikacionit në Detin Baltik, duke përfshirë një kabllo elektrike që lidh Estoninë dhe Finlandën. Autoritetet finlandeze kanë ndaluar një anije që dyshojnë se është pjesë e “flotës hije” të Rusisë, të cilën Moska e përdor për t’iu shmangur sanksioneve.

Kur një faqe interneti e rreme, e cila imitonte faqen e Ministrisë së Mbrojtjes franceze, njoftoi se qytetarët po thirreshin për të luftuar në Ukrainë, ministri francez e dënoi atë si dezinformim rus.

Autoritetet gjermane dyshojnë se Rusia qëndron pas një fushate për bllokimin e shumë tubave të shkarkimit të makinave përpara zgjedhjeve parlamentare të vendit më 23 shkurt, tha një zyrtar i paidentifikuar i inteligjencës evropiane.

Gjithashtu, zyrtarë nga Estonia, Polonia, Letonia dhe Finlanda kanë akuzuar Rusinë dhe Bjellorusinë për drejtimin e emigrantëve në kufijtë e tyre.

Zëdhënësi i Putinit, Dmitry Peskov tha për AP se Kremlinit deri më tani nuk i është treguar “asnjë provë” për të mbështetur akuzat, duke shtuar se Moska “me siguri i hedh poshtë plotësisht” të gjitha pretendimet e tilla.