Musk tha në rrjetin e tij social X se ai “mezi pret të ndjekë penalisht dhe ndëshkojë” njerëzit që komunikojnë me median, pasi New York Times raportoi se ai do të ishte në dijeni të një plani sekret për një luftë të mundshme SHBA-Kinë.
Mirëpo, përkundër këtij kërcënimi të drejtpërdrejtë, disa nëpunës civilë dhanë deklarata për gazetën Politico, në kushte anonimiteti, dhe i thanë se ata “nuk ishin nëpunës të tij”, por nëpunës civilë.
“Njerëzit meritojnë të dinë se ai drejton një operacion jofunksional, shkatërrues dhe mashtrues me ‘Departamentin e tij të Efikasitetit të Qeverisë’,” tha një zyrtar.
Një tjetër tha se “njerëzit që komunikojnë me mediat janë patriotë të vërtetë” dhe se ata thjesht duan më shumë transparencë, prandaj po flasin me mediat amerikane për situatën në agjencitë e tyre.
“Nëse administrata e Biden ose Obama do të bënin diçka të tillë, ata nuk do t’i shpëtonin. Administrata Trump nuk bën përjashtim,” tha ai.
Kërcënimet e Musk nuk i ndaluan mediat të komunikojnë me punëtorët e pakënaqur në agjencitë amerikane dhe Politico pretendon se edhe më shumë punonjës janë paraqitur pas mesazhit të tij, duke thënë se nuk kanë folur kurrë më parë me gazetarët.
Përveç kësaj, pretendon Politico, punëtorët në agjencitë qeveritare gjithashtu kanë frikë se administrata Trump po i monitoron dhe i përgjon. Disa prej tyre i zhvillojnë të gjitha bisedat e tyre në bodrume ose pa telefona dhe përdorin aplikacione të enkriptuara të bisedave.
