Presidentja e shtetit, Vjosa Osmani, e ka quajtur Epopenë e Dukagjinit si një nga momentet më të ndritura të luftës për liri.
Osmani, pas homazheve pranë Kompleksit Memorial të Dëshmorëve në Gllogjan është pritur në kullën e Haradinajve aty ku i pranishëm përveç ish-komandantit të UÇK-së për këtë zonë, Ramush Haradinaj, njëherësh lider i AAK-së, e zyrtarëve të tjerë të kësaj komune, në ballë të vendit ishte edhe, Rifat Jashari.
“Në themelet e Kosovës së pavarur qëndron sakrifica e heronjve të UÇK-së, e familjes Haradinaj dhe e të gjithë atyre që u ngritën kundër padrejtësisë, e për lirinë dhe shtetin tonë”, ka shkruar Osmai që ka shpërndarë edhe fotografi nga kjo vizitë e saj atje.
Ajo tha se me nderime përkulen para dëshmorëve Himë Haradinaj, Gazmend Mehmetaj dhe Agron Mehmetaj, që dhanë jetën në këtë datë, për të mos vdekur kurrë.
“ Ata u bënë simbol i rezistencës, guximit dhe besimit në lirinë e Kosovës. Në Kosovën e pavarur dhe sovrane, amaneti i heronjve na obligon ta ndërtojmë një shtet të fortë, dinjitoz, të përparuar e me aleanca të fuqishme. Liria është trashëgimia e tyre, e përgjegjësia jonë! Lavdi dëshmorëve të kombit! Nderim i përhershëm UÇK-së!”, ka shkruar, Osmani.
Osmani homazhe në Gllogjan në 27 vjetorin e Epopesë së Dukagjinit
Presidentja e Kosovës, Vjosa Osmani, ka bërë homazhe në Kompleksin Memorial të Dëshmorëve në Gllogjan në 27 vjetorin e Epopesë së Dukagjinit.E para e shtetit ka vendosur kurorë lulesh në nderim të dëshmorëve. Bashkë me të shihet edhe kryetari i komunës së Deçanit, Bashkim Ramosaj, nën patronazhin e të cilit po shënohet ky 27 vjetor i Epopesë së Dukagjinit dhe i 26 vjetorit të intervenimit të NATO-s në Kosovë, në bashkëpunim me shoqatat e dala nga lufta e UÇK-së.
