Zyrtari ligjor i Lëvizjes Vetëvendosje që është edhe zëvendësministër i Drejtësisë, Blerim Sallahu ka reaguar pas refuzimit të Supremes ndaj ankesës së këtij subjekti politik, lidhur me votat e ardhura përmes postës për zgjedhjet e 9 shkurtit. Ai ka paralajmëruar se do të bëjnë kërkesë për vlerësim kushtetutshmërie në Gjykatën Kushtetuese dhe masë të përkohshme ndaj vendimit.
Sallahu, ka thënë se pikërisht në kohën kur Prokuroria ka filluar hetimet, Supremja hedhë poshtë ankesën.
“Gjykata Supreme sot ka marrë vendim që të hedh poshtë ankesën tonë në lidhje me procesin e votimit përmes postës. Pra, jemi në kohën kur Prokuroria fillon hetimet në lidhje me dyshimet e bazuara për këtë proces dhe Supremja që hedh poshtë ankesën mbi këto”, tha ai.
Ai ka thënë se nga informacionet që kanë nga brenda Supremes, diskutimi përgjatë vendimit ka qenë kryekëput politik dhe larg të qenit juridik e ligjor gjë, sipas tij, tregon pak a shumë për natyrën e vendimit.
“Por, si Lëvizje Vetëvendosje do të ndjekim të gjitha hallkat ligjore në mënyrë që të sjellim drejtësi për këtë skemë krimi e manipulimi”, ka shkruar ai në reagimin ndaj vendimit të sotëm të Supremes, që ishte edhe dita e fundit e afatit ligjor për vendimarrje.
Ka paralajmëruar se si Vetëvendosje do të parashtrojnë kërkesë për vlerësimin e kushtetutshmërisë së vendimit të Gjykatës Supreme në Gjykatë Kushtetuese, aty ku thotë se do të kërkojnë edhe masën e përkohshme ndaj një vendimi absurd dhe të ndikueshëm politikisht.
