Serbët lokale në veri të Mitrovicës, sot kanë ngritur një barrikadë në Lagjen e Boshnjakëve, vetem 50 metra larg stacionit policor të Kosovës, gjë që e bëri të pamundur kalimin e automjeteve nga pjesa veriore në atë jugore të qytetit.
Lagja e Boshnjakëve është një vendbanim i banuar me shqiptarë, serbë dhe boshnjakë dhe rruga ku është vendosur barrikada është një prej rrugëve që lidh Mitrovicën e veriut me atë të jugut.
Po ashtu, ka informacione që është ngritur edhe një barrikadë tjetër në vendin e njohur si “Dudin Kërsh” në Zveçan, që pamundëson lëvizjen nga Mitrovica e Jugut në drejtim të Rudarës, Komuna e Zveçanit.
Barrikada në Lagjen e Boshnjakëve është e para e vendosur brenda ndonjë qyteti në veri, që kur disa serbë lokalë nisën bllokimin e rrugëve më 10 dhjetor. Barrikadat e tjera janë të vendosura kryesisht në rrugë magjistrale që çojnë drejt pikëkalimeve kufitare Jarinjë dhe Bërnjak, që lidhin Kosovën dhe Serbinë.
Barrikadat e vendosura në veri të vendit tash e tetëmbëdhjetë ditë po vazhdojnë të qëndrojnë aty, ndërsa pikat kufitare në Jarinjë dhe Bërnjak mbesin të mbyllura për shkak të sigurisë.
Lidhur me situatën e krijuar së fundmi në veri të vendit, kryeministri Albin Kurti, të hënën, ka mbledhur në një takim Këshillin e Sigurisë së Kosovës. Në këtë mbledhje, thuhet se strukturat ilegale si dhe grupet kriminale po vazhdojnë të kryejnë akte ekstremiste ndaj qytetarëve të Kosovës, institucioneve shtetërore, ndaj pjesëtarëve të Policisë, gazetarëve, ndaj pjesëtarëve misionit të EULEX-it dhe njësive patrulluese të KFOR-it.
Që kur janë ngritur barrikadat, në veri të Kosovës janë shënuar një numër i incidentesh me armë zjarri, granata dore dhe shok bomba.
Policia e Kosovës ka shtuar prezencën e saj në veri të Kosovës, duke thënë se synon të garantojë siguri për të gjithë qytetarët.
Autoritetet në Kosovë kanë thënë se”bandat kriminale që mbështeten nga Serbia” qëndrojnë pas barrikadave. Qeveria e Kosovës ka thënë se shteti ka kapacitete që t’i heqë barrikadat, por i ka dhënë kohë misionit të NATO-s në Kosovë, KFOR, që të heqë barrikadat.
Presidenti i Serbisë, Aleksandar Vuçiq, ka deklaruar se barrikadat do të hiqen kur Kosova të formojë Asociacionin e komunave me shumicë serbe.
