Pjesëmarrësit e protestës “Asnjë cent më shumë”, të cilët po kundërshtojnë rritjen e çmimit të energjisë elektrike janë duke vazhduar protestën te zyrat e Zyrës së Rregullatorit të Energjisë.
“KEDS t’i kthehet popullit” është një nga mbishkrimet e revoltës së tyre para këtij institucioni.
Në ndërkohë ZRRE ka aprovuar të gjitha pikat që i kishte në rend dite në mbledhjen e sotme. Kjo nënkupton rrjedhimisht edhe shtrenjtim të çmimit të energjisë elektrike për qytetarët e vendit. E kjo rritje pritet të jetë, ashtu siç është paralajmëruar rreth 15 përqind.
Megjithatë, përkundër insistimit të gazetarëve për të mësuar se sa përqind rritet energjia elektrike anëtarët e Bordit të ZRRE-së nuk kanë dhënë përgjigje. Drejtori menaxhues i ZRRE-së, Petrit Pepaj kanë thënë se për këtë çështje do të bëhet publike komunikata. Ndërkaq, më vonë i njëjti ka theksuar se përqindja e rritjes së energjisë për konsumatorët, është një proces tjetër, që ndodh javën tjetër.
