“Barikadat ilegale të ngritura nga serbët e Kosovës duhet të hiqen sa më parë”, thotë Berlini zyrtar. Ai kërkon që Kosova të pranojë zbatimin e asaj që më herët është rënë dakord në lidhje me Asociacionin e Komunave Serbe, shkruan Deutsche Welle.
Qeveria gjermane është “shumë e shqetësuar” për tensionet e fundit në veri të Kosovës. Nga Serbia pritet një qasje konstruktive dhe kjo i është përcjellë Beogradit, tha të mërkurën në Berlin zëdhënësi i MPJ-së, përcjellë agjencia gjermane dpa.
“Retorika nacionaliste, siç e kemi dëgjuar nga Serbia javët e fundit, është krejtësisht e papranueshme”, theksoi përfaqësuesi i Ministrisë gjermane, duke shtuar se edhe rritja e pranisë ushtarake pranë kufirit serb me Kosovën dërgon sinjal të gabuar. Prandaj qeveria gjermane kërkon: “Barikadat ilegale të ngritura nga serbët e Kosovës duhet të hiqen sa më parë”.
Agjencia dpa rikujton se “gati tre javë më parë, militantët serbë ngritën barrikada në veri të Kosovës, të populluar kryesisht me serbë, duke bllokuar veçanërisht rrugët për në pikat kufitare drejt Serbisë”.
Siç shkruan agjencia gjermane, ata po protestojnë për arrestimin e një ish-polici të Kosovës me origjinë serbe, i cili sipas autoriteteve kosovare ka udhëhequr sulmet ndaj zyrtarëve të komisionit zgjedhor. Militantët mbështeten, dhe ndonjëherë edhe jepen udhëzime, nga autoritetet në Beograd”.
