Një anije me aktivistë pro-palestinezë fundoset. “Na goditi një dron pranë brigjeve të Maltës”

Një anije që transportonte aktivistë pro-palestinezë për në Gaza u përfshi nga flakët në ujërat ndërkombëtare pranë Maltës dhe ekuipazhi lëshoi ​​një sinjal SOS pas asaj që ata pretendojnë se ishte një sulm me dron, raporton CNN .

“Anija po fundoset”

Koalicioni i Flotiljes së Lirisë, i cili kundërshton bllokadën e Gazës nga Izraeli, i tha CNN se në bord ndodheshin 32 persona në kohën e sulmit. Sulmi, sipas pretendimeve të tyre, ndodhi pak pas mesnatës sipas kohës lokale.

“Tani ka një vrimë në anije dhe anija po fundoset”, tha zëdhënësja e koalicionit Yasemin Acar, e cila ndodhej në Maltë në kohën e bisedës. Ajo shtoi se anija kishte dërguar thirrje për ndihmë në vendet përreth, përfshirë Maltën, dhe se “një varkë e vogël nga Qiproja jugore po shkonte drejt tyre”. Ajo tha gjithashtu se pas sinjalit SOS, arriti të kontaktojë me disa anëtarë të ekuipazhit.

Koalicioni postoi një video në profilin e tij X që tregon një anije që digjet dhe tym që ngrihet lart. Në videon e dytë që publikuan, dëgjohen dy shpërthime të fuqishme. 

Ata pretendojnë se anija u sulmua nga dronë.

“Anija jonë është 17 kilometra larg bregdetit të Maltës, në ujëra ndërkombëtare, dhe u sulmua dy herë nga një dron”, tha Acar, duke shtuar se objektivat duket se ishin gjeneratorë në harkun e anijes.

“Gjeneratorët nuk po punojnë tani dhe nuk po sigurojnë energji elektrike, dhe aktualisht nuk kemi asnjë kontakt me atë anije”, tha Acar. “Aktualisht ka 30 aktivistë ndërkombëtarë të të drejtave të njeriut në anijen që po fundoset”, shtoi ajo.

Flotilja nuk ka bërë asnjë akuzë se kush mund të jetë pas sulmit.

Sipas të dhënave nga faqet e monitorimit të trafikut detar, anija që merr pjesë në mision quhet Conscience, lundron nën flamurin e Palaut dhe ndodhej në brigjet lindore të Maltës të premten në mëngjes.