Një ngjarje e rëndë ka ndodhur të dielën pasdite në fshatin Leshan të Komunës së Suharekës, ku një person është gjetur i pajetë brenda një veture që ishte përfshirë nga zjarri.
Sipas zëdhënësit të Policisë së Kosovës për rajonin e Prizrenit, Shaqir Bytyqi, rreth orës 14:24 është pranuar një thirrje nga një qytetar, i cili ka raportuar se në vendin e quajtur “Tuma” po digjej një veturë dhe brenda saj ndodhej një person.
“Patrulla policore menjëherë ka shkuar në vend të ngjarjes si dhe janë informuar të gjitha njësitet përgjegjëse për rastin si: Zjarrfikësit, Emergjenca, Sektori i Hetimeve të Stacionit Policor të Suharekës dhe Sektori Rajonal i Hetimeve si dhe eksperti i zjarreve. Nga informatat e para dyshohet se te vendi i quajtur ‘Tuma’ personi M.G. mashkull 82 vjeçar, i cili ishte brenda automjetit të tij ishte përfshirë tërësisht nga zjarri. Me atë rast personi i cili kishte mbetur mrenda ishte i djegur tërësisht me gjithë veturën në vend të ngjarjes”, ka bërë të ditur Bytyqi për RTKlive.
Tutje ai ka bërë të ditur se në konsultim me prokurorin është iniciuar rast “Hetim i vdekjes”, ndërkohë që hetimet po zhvillohen nga Sektori Rajonal i Hetimeve i Drejtorisë Rajonale të Policisë në Prizren.
