Policia e Kosovës ka njoftuar se ka arrestuar një person të dyshuar për veprën penale “Vrasje e rëndë e mbetur në tentativë”, në lidhje me një incident të armatosur që ndodhi më 22 prill, në rrugën “Vëllezërit Gërvalla” në Pejë.
Sipas njoftimit nga Drejtoria Rajonale e Policisë në Pejë, më 22 prill, patrullat policore janë informuar për të shtëna me armë zjarri. Policia është përgjigjur menjëherë, por i dyshuari nuk është hasur në vendin e ngjarjes.
“Pas intervistimit të viktimës, është konfirmuar se i dyshuari kishte shtënë me armë në drejtim të tij, por pa shkaktuar lëndime trupore. Në bashkëpunim me Prokurorinë e Shtetit, është bërë bastisja e shtëpisë së të dyshuarit”, thuhet në njoftim.
Pas hetimeve intensive që kanë zgjatur disa javë, më 13 maj 2025, hetuesit kanë arritur ta identifikojnë dhe arrestojnë të dyshuarin. Gjatë arrestimit, janë gjetur dhe sekuestruar një armë pistoletë e llojit Blowfog, kalibër 9 mm, një karikator, dy fishekë kalibër 9 mm.
Bëhet e ditur se pas intervistimit, me urdhër të prokurorit, i dyshuari është dërguar në mbajtje për 48 orë, ndërkohë që hetimet vazhdojnë.
